申命記 16 · 1888《復傳律例書》（《申命記》，香港理工大學）

你要緊記亞筆月、在耶和華你嘅神面前守逾越節、因為耶和華你嘅神、在亞筆月夜晚帶你出埃及。

你要喺耶和華你嘅神所揀擇嚟安置佢名個處、從牛群羊群中、將逾越節嘅祭牲、獻過耶和華你嘅神。

你不可將有酵嘅餅同埋嚟食、七日之內、要將無酵餅同埋嚟食、即係患難嘅餅、等你一世都記念出埃及個時、因為你出埃及好忙急呀。

七日之內、在你各處地方、不可有酵種、第一日挨晚所獻嘅祭肉、不可留到明日。

耶和華你嘅神所賜過你嘅各城、你不可喺城裏獻逾越節祭。

惟係獻逾越節祭、要在耶和華你嘅神所揀選嚟安置佢名嘅地方、到挨晚日落個時候、即係出埃及嘅時候。

要在耶和華你嘅神所揀擇嘅地方、將祭肉燒嚟食、朝早番回帳幕。

六日之內、你要食無酵餅、到第七日、要在耶和華你嘅神面前有聖會、唔好做工夫。

你要為自己計七個七日、從你始初用鐮刀割麥個時、就起首計七個七日。

你要在耶和華你嘅神面前、守七個七節、將你手中嘅禮物奉獻、係照你心所想嘅、又照耶和華你嘅神所祝福你嘅。

亦要在耶和華你嘅神所揀選嚟安置佢名嘅地方、在耶和華你嘅神面前歡樂、你共你嘅仔、女、僕、婢、及住在你城裏嘅利未人、寄居你處嘅旅客、孤兒、寡婦、都要噉。

你要記念從前在埃及做過奴僕、所以你要遵行呢的律法。

收埋禾場嘅穀、菩提榨嘅酒之後、要守結茅節七日。

當你守節個時、你共你嘅仔、女、僕、婢、及住在你城裏嘅利未人、旅客、孤兒、寡婦、都要歡樂。

七日之內、你要在耶和華你嘅神面前七節、即係在耶和華所揀擇嘅地方、因為耶和華你嘅神在你凡所瞣嘅手所做嘅必祝福你、故此你就歡樂。

每年除酵節、七七節、結茅節、共三次、你哋之中嘅男丁、都要去到神所揀擇嘅地方朝拜耶和華你嘅神、但朝拜耶和華個時、唔好空手。

各人照自己力量嚟獻禮、即係照耶和華你嘅神所賜過你嘅福分。

你要在耶和華你嘅神所賜過你嘅各城裏、為各支派設立審事官、佢必要𢬿公義嚟審判百姓。

不可私曲斷事、不可偏心待人、不可受人財賄、因為財賄能整盲智慧人嘅眼、枉屈公義人嘅說話。

你必要依住公道、等你可以生活、得耶和華你嘅神所賜過你嘅地。

你不可在你為耶和華你嘅神所建立嘅壇邊種樹林。

亦不可為自己設立耶和華你嘅神所憎惡嘅柱像。