申命記 18 · 1888《復傳律例書》（《申命記》，香港理工大學）

做祭司嘅利未人、及利未支派嘅群眾、在以色列人之中冇份得產業、獨係耶和華嘅火祭、作為佢哋嘅產業、就可以食。

佢哋在兄弟之中、必唔得產業、耶和華係佢嘅業、好似佢也曾對佢哋講嘅。

百姓獻祭物、或牛、或羊、有的係祭司所當受嘅、必要將腿共兩便顋頰、及脾胃、俾過祭司。

始初收成嘅穀、或酒、或油、或初結嘅果子、及初剪嘅綿羊毛、亦要俾過祭司。

因為耶和華你嘅神、揀選佢共佢嘅子孫、從你哋各支派中、永遠託耶和華嘅名、侍立奉事。

若有一個利未人、佢嘅子孫、從佢所生以色列嘅一個城出嚟、誠心願意、到耶和華所揀擇嘅地方。

佢就必託從耶和華佢神嘅名嚟奉事、如似佢兄弟中嘅利未人、在耶和華面前侍立噉。

就要在佢所賣嘅產業之外、俾佢哋有份、同食祭物。

你到嘵耶和華你嘅神所賜過你嘅地方、唔好學個處各國可憎惡嘅行為。

你哋之中、不可有人使仔女經過火中、及行邪術嘅、靠占卜嘅術數嘅、巫術嘅。

畫符念咒嘅、鈎魂嘅、問覡嘅、及問死人嘅。

凡行呢的、都係耶和華所憎惡、因呢的可憎惡嘅事、耶和華你嘅神、就在面前趕逐佢哋。

你應當在耶和華你嘅神面前做完全嘅。

因你所承受嘅國、個的人平素係聽從占卜嘅、行邪術嘅、但係耶和華你嘅神、斷唔容你做噉樣嘅事。

耶和華你嘅神、將來必在你兄弟之中、為你立一個先知、似我一樣、你哋要聽從佢。

照你從前在何烈山、大會嘅日子、也曾求耶和華你嘅神話、願耶和華我嘅神、再唔使我聽聞佢嘅聲音、亦唔再使我睇見猛火、免致我死亡。

耶和華對我話、佢哋所講係著呀。

我必在佢兄弟之中、為佢哋立一個先知、似你一樣、我將我嘅說話、傳在佢口中、佢必將我所吩咐嘅、示諭大眾。

若有人唔聽我話、即係個先知託我名嚟講嘅、我必究佢嘅罪。

若有先知擅自託我嘅名、傳我所未曾吩咐佢傳嘅說話、或託別神嘅名嚟講、個先知必要受死。

你哋心裏、若話耶和華所未曾吩咐嘅說話、我哋點能知到呢。

但凡先知託耶和華名嚟講、若係個的事唔成就、唔應驗、噉就係耶和華所未曾吩咐嘅、實係先知擅自嚟講、你哋唔使怕佢。