申命記 34 · 1888《復傳律例書》（《申命記》，香港理工大學）

摩西從摩押平原、上尼破山、在耶利哥對面、又上到比士迦山頂、耶和華將通基列至到但指示佢。

又將通納大利以法蓮共馬拿西嘅地方、通猶大至到西海。

及南方耶利哥山谷嘅平原、即係棗樹嘅城至到瑣耳、都指示佢。

耶和華對佢話、我向亞伯拉罕以撒雅各所發誓話、我必將地賜過你嘅後裔、即係呢處、我已經使你眼見、惟係你不得過去。

噉就耶和華嘅僕人摩西、就死在個處、即係摩押地、照耶和華所講。

耶和華將佢葬落摩押地嘅山谷、共伯比耳對面、惟係直到今日、冇人知到佢嘅墳墓。

摩西死個時、有一百二十歲、佢眼未曾矇、佢力未曾弱。

以色列人在摩押平原、為摩西哀哭三十日、哀哭嘅日期滿嘵。

嫩嘅仔約書亞得充滿智慧嘅靈、因摩西也曾用手按在佢頭上、以色列人聽佢話、遵從耶和華所吩咐摩西嘅嚟行。

後來以色列人中、再冇先知似得摩西嘅、共耶和華敵面相識。

佢照耶和華所打發、在埃及地共法老及一切臣僕、法老嘅全地、嚟行異蹟奇事。

又照耶和華嘅大能力、大驚慌、即係摩西在以色列眾人眼前所行嘅。