申命記 5 · 1888《復傳律例書》（《申命記》，香港理工大學數據）

摩西召以色列會眾、對佢哋話、以色列人呀、我今日向你耳邊所講嘅律法、你哋要聽、等可以學習、謹守、遵行。

耶和華我哋嘅神、在何烈山、共我哋立約。

呢的約、耶和華唔共我列祖立嘅、係共我哋今日在呢處存活嘅人立嘅。

耶和華在山上、從火中當面吩咐你哋。

個時我企在耶和華及你哋嘅中間、將耶和華嘅說話傳過你哋、因你哋見火就驚慌、唔敢上山。

耶和華話、我耶和華係你哋嘅神、帶你哋離開做奴僕嘅屋出埃及地嘅。

我之外你哋唔好有別個神。

唔好為自己雕刻偶像、學番天上地下、及地下水中各物嘅樣子。

唔好跪處拜佢、亦唔好服事佢、因為我耶和華係你哋嘅神、不容人有別個神、憎惡我嘅、罰佢嘅罪惡、自祖父到子孫、三四代。

愛我及守我誡命嗁、就賜恩過佢、至到千千代。

你哋唔好妄稱耶和華嘅名、因為妄稱佢嘅、耶和華必唔以佢為冇罪呀。

要守安息日為聖日、遵依耶和華你嘅神所吩咐你哋嘅。

六日之內要做各樣工夫。

第七日、係耶和華你神嘅安息日、個日、唔好做工夫、你共你仔、女、僕、婢、牛、驢、各樣畜牲、及在你屋內寄居嘅、都係、使你嘅僕婢、都得安息、好似你噉。

你哋要記念從前在埃及做奴僕、耶和華你嘅神用大能力、舉手帶你哋出嘵個處、因此耶和華你嘅神吩咐你哋守安息日。

你哋應當遵依耶和華你嘅神所吩咐、孝敬你嘅父母、等你可以在你神所賜過你嘅地長久享福。

你不可殺人。

不可行淫。

不可偷嘢。

不可妄證你嘅鄰舍。

不可貪你隣舍嘅妻、共佢嘅屋、田、僕、婢、牛、驢、及凡佢所有嘅。

呢的說話、係耶和華在上、從火中雲中及黑暗之中、大聲示諭你哋全會冇加說話添、又寫落兩塊石碑、交過我。

火燄燒山之時、你哋從黑暗中、聽聞有聲出、就各支派嘅牧長共長老嚟到我處。

而且對我話、睇吖、耶和華我哋嘅神、將榮光威權顯示過我哋、我哋聽聞佢嘅聲音、從火中處出嚟、就今日見到神共人講、人都重生。

我哋何必要死呢、因為呢的猛火近燒我哋、若係再聽聞耶和華我神嘅聲音、就必死咯。

萬人之中、乜誰似得我哋聽聞活神從火中所講嘅聲音重生活呢。

請你去聽耶和華我哋嘅神、凡所示諭、我神凡所示諭你嘅、傳過我哋、我哋是必依住遵行。

你哋共我噉講、耶和華聽過就示諭我話、我已經聽聞呢的百姓嘅說話、共你所講嘅、俱係善呀。

我願佢哋有噉嘅心、使佢哋畏懼我、常時守我嘅誡命、等佢哋共子孫、永遠得福。

要你去對佢哋話、你哋再番去你嘅帳幕。

惟係你要企在呢處、等待我𢬿立命律例法度指示你、等你傳教百姓、使佢哋在我所賜過佢嘅地方嚟行。

故此你哋必要謹守遵行耶和華你嘅神所吩咐你哋嘅、唔好轉左便右便。

耶和華你嘅神所吩咐你哋行嘅個條路要遵行、等可以得生得福而且在你所承受嘅地加增日子。