出埃及記 18 · 1888《出埃及記》（粵語聯合譯本，香港理工大學）

米田祭司葉羅、係摩西嘅外父、佢聽聞神為摩西及百姓以色列人所行嘅事、即係耶和華已經帶以色列人出埃及。

摩西打發個妻西坡喇去歸之後、摩西嘅外父葉羅帶佢番嚟。

與及佢兩個仔、一個名叫革順、意思話、我喺異邦做旅客嘅。

一個名叫以列撒、意思話、我父親嘅神幫助我脫離法老嘅刀劍。

摩西嘅外父葉羅、同埋摩西嘅妻子、去到曠野見摩西、在神嘅山安營個處。

對摩西話、我即係你外父葉羅、如今同埋你妻及兩個仔嚟你處。

摩西出去迎接外父、鞠躬親嘴、彼此問安、同入帳幕。

摩西𢬿耶和華為以色列人、向法老共埃及人所行嘅事、及路上所遇著嘅苦難、耶和華點樣拯救佢哋、都講嘥過外父知。

葉羅因耶和華向以色列人所行嘅善事、又拯救佢哋脫離埃及人嘅手、就好歡喜。

葉羅話、當要讚美耶和華、佢拯救你脫離埃及人嘅手、及法老嘅手、即係拯救百姓脫離埃及人嘅手呀。

我如今知到耶和華大過眾神、因為埃及人行為驕傲、耶和華已經贏嘵佢。

摩西嘅外父葉羅、擰燔祭及祭物獻過神、亞倫同埋以色列長老都嚟到、共摩西外父喺神面前食餅。

明日、摩西坐處審問百姓、的百姓從朝到晚、都圍住摩西企處。

摩西外父見摩西向百姓所做嘅、就話、你向百姓做乜嘢事、你為乜獨自坐處、令百姓從朝到晚、圍住你企處呢。

摩西對外父話、因百姓嚟我處問神之意。

佢哋或有事就嚟我處、我審問兩造、𢬿神嘅律例法度指示佢哋。

摩西嘅外父對佢話、你所做嘅唔好呀。

你共呢的百姓、都必勞苦、因為呢的事好大、你不能獨自打理呀。

你要聽我講、我為你設好法子、神必同埋你、你要替百姓喺神面前、將各件案情奏過神知。

要將律例法度教佢哋、指示佢當行嘅路、當做嘅事。

又要喺百姓之中、揀擇有才幹嘅、畏神嘅、真實嘅、憎惡貪婪嘅、立佢在百姓之上、做千總、百總、把總、十長。

使佢隨時審問百姓、惟係大事、就禀過你知、若係小事、就佢自己審判、你噉樣打理就係好容易嘅、佢哋亦共你代勞咯。

你若噉樣做、神亦噉樣吩咐你、你就可以當此職任、百姓亦可以安樂番去住所。

摩西聽外父話、都照所講嘅嚟做。

摩西喺以色列人之中揀擇有才幹嘅、立佢管理百姓、即係千總、百總、把總、十長。

隨時審問百姓、凡係難事、就禀過摩西知、若係小事、就自己審問。

摩西送外父起程、佢就番去本土。