出埃及記 4 · 1888《出埃及記》（粵語聯合譯本，香港理工大學數據）

摩西答話、怕佢哋唔信我、唔聽從我講、話、耶和華未曾顯現過你。

耶和華對摩西話、在你手中係乜嘢。

話、係拐杖、耶和華話、𢫕佢落地、𢫕落地就變為蛇、摩西避埋一便。

耶和華對摩西話、伸你手揸住蛇尾、就伸手揸住、在手中變為拐杖。

又話、你做出呢樣、等以色列人信耶和華、即係佢哋列祖嘅神、亞伯拉罕嘅神、以撒嘅神、雅各嘅神、曾顯現過你。

耶和華又對佢話、擠你手入懷中、就擠手落懷中、伸出、滿手有癩、好似雪咁白。

又話、再擠你入懷中、就再擠落懷中、伸出就變番原身嘅色。

又話、若係佢哋唔信你、或第一件奇跡唔噲令佢哋信、就第二件奇跡噲令佢哋信。

設使佢都唔信呢兩樣奇跡、又唔聽從你所講、你就攞河水倒落旱地、你所攞嘅河水、必喺旱地變為血。

摩西對耶和華話、我主呀、我平素冇口才、至到你吩咐你僕之後、亦係噉、我係拙口笨舌嘅。

耶和華對佢話、造人嘅口係乜誰呢、造佢聾嘅、啞嘅、或見得嘅、或盲眼嘅、又係乜誰呢、豈唔係我耶和華咩。

你只管去喇、我必幫助你口才、指示你所當講嘅。

摩西話、主呀、求你揀選一個就打發佢去罷喇。

耶和華惱怒答摩西、豈唔有利未人亞倫你兄弟咩、我知佢好口才、睇吖、佢將近出嚟迎接你、見嘵你心中必歡喜。

你要對佢講、話明佢口應該講嘅說話、我必幫助你共佢嘅口才、而且指示你哋所當行嘅事。

亞倫必為你對百姓講、佢替代你嘅口、你向佢替代神。

你手要揸住呢條拐杖、𢬿嚟行各樣奇跡。

摩西去嘵、番到外父葉羅處、對佢話、求你俾我番去埃及、到我兄弟處、睇吓佢哋重喺處唔喺、葉羅對摩西話、你平安去喇。

耶和華喺米田對摩西話、你番去埃及喇、因為所有找尋你性命嘅人、已經死嘥咯。

摩西就帶住妻子、又令佢騎驢、番去埃及地、摩西手揸住神嘅拐杖。

耶和華對摩西話、凡我交過你手中嘅奇跡、你去到埃及個時、喺法老面前、要謹慎做嘥、但我令佢心剛硬、等佢唔肯放以色列人去。

你要對法老話、耶和華噉樣講話、以色列係我嘅仔、即係長子呀。

我吩咐你放嘵我嘅仔去服事我、你若唔放佢、我必殺你嘅仔即係長子。

摩西喺路上歇宿嘅地方、耶和華遇著佢、想殺佢。

西坡喇擰一塊利石、割佢仔嘅陽皮、𢫕落摩西腳下、話、你真係做我嘅血郎咯。

耶和華就放嘵佢、婦人話你係血郎、因為割禮呀。

耶和華對亞倫話、你去曠野迎接摩西、亞倫就去、喺神嘅山迎接佢、共佢親嘴。

摩西𢬿耶和華打發佢個的說話、與及所吩咐嘅奇跡、講過亞倫知。

摩西亞倫去聚集以色列嘅眾長老。

耶和華對摩西所講嘅說話、亞倫就講嘥出嚟、又喺百姓面前行各樣奇跡。

百姓都信、既聽聞耶和華睇顧以色列人、鑒察佢哋嘅苦、就叩頭崇拜。