創世記 42 · 1873《創世記》（粵語聯合譯本，香港理工大學數據）

雅各知到埃及有穀、就對眾子話、你地為乜重彼此相望呢。

又話、我聽聞埃及有穀、你地落去個處糶的番嚟、我地就可以得生、免致死亡。

於是約瑟兄弟十人都落去埃及糶穀。

獨係約瑟嘅細佬便雅憫、雅各唔打發佢同埋兄弟去、因佢話、我怕佢遇著災害呀。

迦南嘅地方飢荒、眾人去糶穀、以色列眾子、亦在其中。

個陣時、約瑟揸一國嘅大權、糶穀過眾民、約瑟嘅兄弟嚟到喺佢面前跪倒地處。

約瑟一見兄弟、就認得、但詐作唔認得、大聲喝佢地話、你地從邊處嚟。答話、從迦南地嚟糶穀。

約瑟認得眾兄弟、惟你兄弟唔認得佢。

約瑟記起從前嘅夢、係夢及佢地嘅。就對兄弟話、你地必定係探子、嚟打聽我國虛實嘅。

佢地話、主、唔係、僕不過為糶穀嚟呮。

我地係同父嘅兄弟、一向真實、確唔係探子。

約瑟話、唔係、必係嚟打聽我國虛實嘅。

佢地話、飲係兄弟十二人、迦南地一個父親所生、至細嘅如今喺父親處、有一個係死嘵。

約瑟話、我已經話你地係探子、真正唔錯。

我指住法老嚟誓、你唔帶個細佬嚟、必唔俾你出去呢處、噉就試得你出咯。

你地之中、打發一個帶你嘅細佬嚟、其餘都困在呢處、致顯出你地說話係真或假、唔係噉、我指住法老嚟誓、你地必係探子咯。

於是困埋佢地一處三日。

到第三日、約瑟對佢地話、我係敬畏上帝嘅、你依我嚟做就得生。

你地如果係真實、就你兄弟之中、留落一個喺監、其餘載穀去歸、救你家中嘅飢荒。

又帶你至細嘅細佬嚟見我、噉就顯出你說話係真、亦免你地死亡、佢地就照噉行。

佢地彼此相講話、我地因細佬嘅事、真係有罪咯、我地見佢咁苦心嚟求、總唔聽佢、所以要受呢場苦楚。

流便對佢地話、我豈唔係話過、唔好害個童子咩、但你地唔聽、故此流佢血嘅罪、如今歸我地咯。

兄弟唔知約瑟識得佢話、因為約瑟共佢地講、係用人傳話呀。

約瑟退後嚟哭、番出嚟、又共佢地講、喺兄弟面前、揀西面出嚟綁住佢。

約瑟吩咐人、𢬿穀擠滿佢地袋、又擠番各人嘅銀落袋裏、又送的路上嘅乾糧添、約瑟係噉樣看待佢地。

佢地將穀馱在驢背、就喺個處去。

到歇店、其中有一人、打開個袋、想攞穀嚟餵驢、睇見自己嘅銀在袋口處。

就對兄弟話、我嘅銀喺番處、喺我嘅袋呀。眾兄弟嘅心嚇一大驚、彼此相講話、上帝噉樣待我、係點呢。

番到迦南地、見嘵父親雅各、就𢬿所遇嘅事、講嘥佢知話、

個處嘅主、大聲喝我地、當我地係探子。

我地話、我係真實嘅人、唔係探子。

我地兄弟十二人、同一個父親所生、有一個細佬已經死嘵、至細嘅、同埋父親喺迦南處。

個處嘅主對我話、你如果係真實、我試得你出、你兄弟之中、留落一個喺我處、其餘載穀去歸、救你家中嘅飢、

帶你至細個細佬嚟、噉樣就知你唔係探子、乃係真實嘅人、我就俾番兄弟過你、任從你地喺呢處做買賣。

及至倒落的袋個時、各人個包銀、喺番各人袋處、父子睇見個的銀、眾人都慌起嚟。

雅各對眾子話、你地喪失我仔咯、約瑟已經冇嘵、西面亦冇嘵、如今又要攞便雅憫去、呢的事、都係害我嘅咯。

流便對父親話、你將佢交過我手、我是必帶佢番你處、若唔帶得佢番嚟、你就殺我兩個仔。

雅各話、我斷唔俾個細仔你帶去嘅、佢大佬死嘵、單獨剩番佢、倘若佢在你地所行之路上受害、係令我白髮凄涼入墳墓咯。