「我實實話你哋知，人入羊欄，唔由門口入去，由別處上去嘅，係偷竊呀、盗賊呀。
由門口入嘅，致係養羊嘅人。
看門嘅開門過佢，羊聽佢聲；佢依住名嚟叫自己嘅羊，就引佢出去。
既放嘥自己嘅羊，就先過羊行；羊跟從佢，因為認得佢聲呀。
羊唔跟從生步人，必定逃避佢，因為唔認得生步人嘅聲呀。」
耶穌𢬿呢的譬喻對眾人講，但眾人唔知佢所講嘅係乜野。
耶穌又對眾人話：「我實實話你知，我係羊嘅門。
但凡先過我嚟嘅，係偷竊呀、盗賊呀，但個的羊唔聽從佢。
我係門，若有人由我處入，就必得救，而且出入都得草食。
偷竊嘅嚟到，獨係想偷、想殺、想滅；我嚟到，令佢得生，而且得倒越發多。
我係善養羊嘅人，善養羊嘅為羊捨生命。
做僱工嘅唔係做養羊嘅，唔係羊所屬嘅，睇見豺狼嚟到，就離開羊走去；豺狼捉住的羊，就散開羊群咯。
佢走去，因佢係僱工呮，唔睇顧的羊。
我係善養羊嘅，我識我嘅羊，我嘅羊亦識我，
好似父識我，我亦識父，而且我為羊捨生命呀。
我重有的羊唔屬呢個欄嘅，我都要帶佢嚟；佢必定聽我聲音，就必成一群，歸一牧者咯。
因此父愛我，因我捨嘵我生命，等我可以攞番。
冇人由我處奪得，係我自己捨嘅；我有權捨去，亦有權攞番。我也曾喺我父處奉呢的命呀。」
於是猶太人之中，因呢的說話再有爭論。
其中有好多話：「佢被鬼迷，發顚起嚟，你哋因何聽佢說話呢？」
有的話：「呢的唔係被鬼迷嘅說話，鬼能開得盲人嘅眼咩？」
喺耶路撒冷有修殿嘅節，係冬天時候。
耶穌喺殿裏所羅門嘅廊頭處行。
猶太人圍住佢，對佢話：「你令我哋思疑到幾耐呢？你若係基督，就明白話我知。」
耶穌答佢哋話：「我也曾話你知，你哋唔信；我託我父嘅名所做嘅事，為我做證。
但你哋唔信，因你唔係我嘅羊。
我嘅羊聽我聲，我識佢，佢亦跟我。
而且我賜永生過佢地，佢哋必定永唔沉淪，亦冇人奪得佢出我手。
父𢬿佢哋賜過我嘅，係大過萬有，又冇人奪得佢出我父嘅手。
我共我父係一呀。」
噉就猶太人再執石想矴佢。
耶穌答佢哋話：「我由我父𢬿好多件善事指示你，其中為邊一件𢬿石想矴我呢？」
猶太人答佢話：「我哋唔係為善事𢬿石矴你，係為你褻凟嘅說話，而且因你係人，反作自己係上帝。」
耶穌答佢哋話：「在你律法，豈唔係有寫話『我稱你哋係上帝』咩？
聖書嘅說話都不能廢得；奉上帝命嘅人，尚且稱為上帝，
何况父所成聖、又打發降臨世上嘅，自己稱為上帝之子，你話係褻凟咩？
若我唔做我父嘅工夫，就咪信我。
但我若做出嚟，你雖然唔信我，要信個的工夫，等你知到明白，父係在我，我係在父呀。」
於是眾人又想執住佢，耶穌避甩佢手去嘵。
再去約但外，到約翰初時施洗嘅地方，就喺個處住。
好多人嚟佢處，而且話：「約翰冇行異跡，但約翰凡所講及呢個人嘅都係真呀。」
喺個處好多人信佢。