此後，猶太人有一個節，耶穌上耶路撒冷。
耶路撒冷近住羊門有一個池，希伯來土音叫做畢士大，有五個廊頭。
其中瞓倒好多病人，係盲嘅、跛嘅、血枯嘅，等水喐動。
因為天使有時落池攪喐的水，水喐之後第一個落池嘅，唔論有乜野病，就得好番。
喺個處有一個人，病嘵三十八年。
耶穌見佢瞓處，知到佢病嘵好耐，就對佢話：「你想好番唔呢？」
個病人答佢話：「主呀，當水喐之時，我冇人扶我落池；及至我嚟之時，別人先過我落去咯。」
耶穌對佢話：「起身，擰你床鋪行喇！」
個人立刻好番，擰起佢床鋪就行。個日係安息日。
所以猶太人對個好番嘅人話：「今日係安息日，你擰床鋪係唔著呀。」
答佢哋話：「令我好番嘅對我話：『擰你床鋪行。』」
佢哋問佢話：「叫你擰床鋪行嘅，係乜人呢？」
得好番嘅唔知係乜誰，因為喺個處人多，耶穌就避嘵。
此後，耶穌喺殿遇著個個人，就對佢話：「你已經好番，咪再犯罪，免至受難更關係呀。」
個人去話過猶太人知：「令佢好番嘅係耶穌呀。」
故此猶太人迫害耶穌，因佢當安息日做呢的事。
耶穌答佢哋話：「我父做事至到如今，我亦做呀。」
因噉樣，猶太人越發想殺佢，因佢唔止犯安息日，兼且話上帝係佢父，以為自己共上帝係平等。
耶穌就答佢哋話：「我實實話你知，倘若子未見過父所做嘅，自己就一件唔做得；因為父所做嘅事，子亦照樣做。
父愛個子，就𢬿自己所有做嘅嚟指示佢，而且要𢬿大過呢的事嘅指示佢，令你哋見出奇。
因為好似父起死者令佢復生，子亦噉樣隨自己嘅意嚟令人復生。
因為父唔審判人，係𢬿審判交嘥過子，
令眾人敬子，好似敬父；唔敬個子嘅，即係唔敬差遣佢嘅父。
我實實話你哋知，聽我說話兼信差遣我嘅，有永生，又唔至定罪，係已經出死入生呀。
我實實話你哋知，時候將到，如今係咯，死者必定聞上帝子嘅聲，個的聞嘅必定生。
因為好似個父在自己有生命，佢賜過子亦係噉樣在自己有生命，
而且賜權過佢嚟審判，因佢係人子呀。
咪以為呢的係出奇，因為時候將到，但凡在墳墓嘅必聞得佢聲，
就出嚟；個的行善嘅復活得永生，個的行惡嘅復活得定罪。
我自己不能擅自做一件事，我照依所聞嘅嚟審判；我審判係公道，因為我唔係依住自己旨意嚟做，係依住差遣我者嘅旨意呀。
我若為自己做證，我嘅證唔係真。
有別個為我做證嘅，我知到佢為我所證嘅係真呀。
你也曾打發人去約翰處，佢為真嘅嚟做證。
其實我唔使人做證，但我講呢的，係令你哋得救呀。
約翰係做點著而且光明嘅燈，你哋暫時歡喜佢光。
但我有大過約翰嘅證據，因為父賜我成就嘅工夫，即係我所做嘅工夫，呢的就證明我係父所差遣嘅哩。
而且父，即差遣我者，亦為我做證；你哋從來未聞佢聲音，未見佢形狀。
你冇佢嘅道存在你心裏，因為佢所差遣嘅，你唔信佢。
你要考究聖書，因為你以為其中有永生；個的書就係為我做證嘅呀。
但你哋唔肯親就我嚟得生命。
我唔求人嘅榮耀呀。
但我知到你哋胸中冇愛上帝嘅心。
我托我父嘅名嚟到，你唔招接我；別人若托自己名嚟到，你就招接佢。
你哋彼此受榮耀，唔求由獨一位上帝嚟嘅榮耀，點能信得呢？
咪估我喺父處告訟你哋；有一個告訟你嘅，即係你所倚恃嘅摩西呀。
若係你也曾信摩西，亦必定信我，因為佢所寫落嘅係指我。
若係你唔信佢嘅書，點信我嘅說話呢？」