路加福音 10 · 1883《路加傳福音書》（粵語聯合譯本修訂本，香港教育大學數據）

此後主又立七十人，打發佢一對對，先到自己所想去嘅各城各地方。

對佢話，要收割係多，但工人少，所以應該求田主，打發人去收割呀。

你哋去喇，我打發你，好似羊仔入豺狼之中。

唔好帶荷包，共袋共鞋，路上唔使共人行禮。

入到人家，就要先話，呢家平安。

倘若有應得平安嘅人喺處，你所求嘅平安，就歸佢，倘若唔係，就歸番你咯。

你喺個家住，佢所供奉嘅，隨飲隨食，因為工人得工錢，係着嘅，唔好喺呢家又搬去別家。

所入嘅城，有人接你，就食佢所供奉嘅。

喺個處見有病嘅，就醫好佢，兼之對眾人話，上帝嘅國近住你嚹。

唔論入邊個城，人若唔肯接你，就行出去街。

話，你城嘅塵，搭倒我脚嘅，如今對住你拍甩，雖然，你亦當知上帝嘅國，已經近咯。

我話你哋知，到個日所多馬嘅刑罰，比較呢個城嘅，重易受呀。

哥拉汛有禍咯，伯賽大有禍咯，因為喺你之中，所行嘅奇能，若行在推羅西頓，佢哋就大早着麻衫，坐倒灰處，嚟悔改咯。

但到審判個日，推羅西頓嘅刑罰，比較你嘅更易受呀。

迦伯農呀，你得升高到天咩，將來必推落地獄。

又話，聽從你嘅，即係聽從我，睇輕你嘅，即係睇輕我，睇輕我，即係睇輕打發我嚟嘅呀。

七十人歡歡喜喜番嚟話，主，因你嘅名，鬼都服我哋呀。

耶穌對佢哋話，我睇見撒但喺天跌落嚟，好似閃電噉樣。

我𢬿能幹賜過你，可以踹得蛇共蠍，制服仇敵各樣嘅權勢，必定冇損害你嘅。

但唔使因為鬼服你就歡喜，要因為你嘅名，寫落在天，致係歡喜呀。

個陣時，耶穌心中歡喜話，父呀，你係天地嘅主呀，我讚美你，因為你將呢的事情，對住智慧嘅，通達嘅，就隱藏埋，對住小子，就顯出嚟，父呀，因為你見噉樣係善咯。

萬物都係天父賜過我，除父之外，冇人識邊個係子，除嘵子共子所歡喜指點嘅，冇人識邊個係父。

耶穌回頭睇吓門生，靜靜對佢話，睇見你所見嘅，個的眼有福咯。

我話你哋知，好多先知共君王，都想見你哋所見嘅，又唔得見，想聽你哋所聽嘅，又唔得聞。

個陣時，有個教法師起，嚟試耶穌話，老師，我應該點樣做，致可以得永生呢。

耶穌對佢話，律法所寫嘅，係點樣呢，你所讀嘅，係點樣呢。

答話，應該盡心盡性，盡力盡意，愛主你嘅上帝又愛鄰舍好似自己。

耶穌對佢話，你所答嘅係着，噉樣做，就必得生咯。

教法師想稱自己為義，就對耶穌話，邊個係我鄰舍呢。

耶穌答話，有一人，從耶路撒冷落去耶利哥，遇着的賊，剝佢衣服，打傷佢到半死，丟佢喺處去嘵。

適值有個祭司，從個條路落嚟，睇見佢，就喺第邊去嘵。

又有個利未人，嚟到個處，行前去睇吓佢，亦喺第邊去嘵。

但有個撒馬利亞人遊行之時，嚟到個處地方，一見就可憐佢。

行埋佢處，包住佢傷口，𢬿油共酒斟落去，將自己所騎嘅畜生，扶佢上去騎，帶到歇店嚟打理佢。

第二日，擰出二錢銀嚟，交過店主話，請你照顧佢，若係使過你嘅，等我番嚟，必還番你。

呢三個人之中，你估邊個係遇着賊嘅鄰舍呢。

教法師話，可憐佢個個咯，耶穌對佢話，你去照噉樣做喇。

佢哋行路個時，耶穌入一條村，有一個婦人，名叫馬大，迎接耶穌，入佢嘅屋。

佢有個妹，名叫馬利亞，坐倒主嘅脚下，聽佢道理。

馬大供應嘅事多，心煩意亂，就行埋對耶穌話，主呀，我嘅姊妹，剩我一人，獨自供應，你都唔理咩，要吩咐佢幫助我喇。

主答佢話，馬大呀，馬大呀，你因為事多，就心思擾亂。

但緊要嘅，係一件呮，馬利亞已經揀倒好嘅事業，總唔奪得佢嘅咯。