耶穌喺一處祈禱，已經完，佢門生有一個對佢話：「主，請教我哋祈禱，好似約翰教佢嘅門生噉樣。」
耶穌對佢哋話：「你哋祈禱個陣時，應當噉話：『我哋嘅父在天，願你嘅名係聖；你嘅國降臨；你嘅旨意得成就，在地好似在天一樣。
我哋需用嘅糧，日日俾我哋。
求赦免我哋嘅罪，因為我哋亦赦免凡欠負我嘅；咪引我哋入誘惑，就救我哋脫離罪惡。』」
又對佢哋話：「你哋乜誰有個朋友，半夜去到對佢話：『朋友呀，請你借三個餅過我，
因為我有朋友喺路上嚟，冇野供應佢呀。』
佢喺裏頭答話：『咪嘈我喇，已經閂埋門咯，我共我嘅仔女喺床處，唔起得身嚟俾你呀。』
我話你哋知，縱然唔因佢係朋友起身嚟俾佢，但因佢咁𠼮求，亦必起身嚟俾够佢用呀。
我又話你哋知：求，就俾你；揾，就揾倒；打門，就開過你咯。
因為但凡求嘅，就得倒；揾嘅，就揾倒；打門嘅，就必得開呀。
你哋之中做父親嘅，邊個有仔求餅，反轉俾石過佢呢？求魚，反轉俾蛇過佢當作魚呢？
或求蛋，反轉俾蠍過佢呢？
你哋雖係惡人，尚且知到俾好野過仔女，何况天父豈唔𢬿聖靈賜過求佢嘅咩？」
耶穌趕一隻啞鬼，鬼出嘵，啞嘅人就噲講，眾人見出奇。
其中有的人話：「佢倚賴鬼王別西卜嚟趕鬼呮。」
又有的嚟試佢，求顯出從天嚟嘅奇兆。
耶穌知佢哋嘅意思，就對佢哋話：「但凡國自己相爭，就必定變為墟；一家自己相爭，就必定敗壞。
若係撒但自己相爭，就佢嘅國點樣建立呢？因為你哋話我倚賴別西卜嚟趕鬼。
若係我倚賴別西卜嚟趕鬼，就你嘅子弟倚賴邊個嚟趕鬼呢？故此佢哋將議論你咯。
若係我倚賴上帝嘅手嚟趕鬼，噉就上帝國降臨到你咯。
有個勇士將軍器嚟看守佢屋個陣時，佢所有嘅物件就穩當咯。
惟係有越發勇力嘅人嚟打贏佢，搶嘵佢所恃嘅武具，就分開佢嘅贓物咯。
唔歸向我嘅，就係攻打我；唔共我聚埋嘅，就係分散嘅咯。
邪鬼既離開人，喺旱地或來或往，想安樂，又唔得，就話：『我要番去我出嚟個間屋。』
去到就見個間屋已經打掃乾淨，又粉飾好嘥，
就出去帶七隻鬼，惡過自己嘅，同埋入去住；噉就個個人嘅後患，比較先日越發關係。」
講緊呢的個陣時，眾人之中有一個女人大聲對佢話：「懷你胎嘅、喂奶過你嘅，有福咯！」
耶穌話：「唔似聽上帝嘅道理，而且遵守嘅，更有福呀。」
眾人擠擁聚集個時，耶穌起首講話：「呢個係惡嘅世代，想睇奇兆；除約拿嘅奇兆之外，冇𢬿別樣奇兆俾佢睇咯。
因為約拿喺尼尼微人處做奇兆，噉樣人子亦將喺呢個世代做奇兆咯。
南方嘅女王當審判個時，對呢代嘅人噲起嚟定佢嘅罪；因為女王喺地之極嚟聽所羅門嘅智慧，何况有大過所羅門嘅喺呢處呀。
尼尼微人當審判個時，對呢代嘅人噲起嚟定佢嘅罪；因為尼尼微人聽約拿宣講就悔改，何况有大過約拿嘅喺呢處呀。
冇人點着燈擠落暗暗[口焙]地方，或擠落斗下底嘅；必係擠倒燈臺上，等入嚟嘅人睇見個的光呀。
你眼就係身嘅燈哩。你嘅眼若係明，就你一身都光；你嘅眼若係矇，就你一身都暗。
故此要謹慎，免至你裏頭嘅光變為暗呀。
倘若你全身光明，冇一點黑暗，噉就個的光完全，好似燈嘅光燄照住你咯。」
耶穌講緊個時，有一個𠵽唎㘔人請佢同食朝飯，耶穌就入去坐席。
個𠵽唎㘔人見耶穌唔先洗手致食，就以為出奇。
主對佢話：「你哋𠵽唎㘔人，杯盤外邊就整到潔淨，但你哋心內就積滿搶奪、惡毒嘅念頭。
愚蠢嘅人呀，造外頭嘅，豈唔亦造裏頭咩？
但𢬿你所有嘅施捨過人，就一的都潔淨咯。
你哋𠵽唎㘔人有禍咯！因為你𢬿薄荷、芸香及各樣蔬菜十分納一；至於公義共愛敬上帝，你就廢嘵。但呢的係你所應該做嘅，個的亦唔好唔做呀。
你哋𠵽唎㘔人有禍咯！因為你歡喜喺會堂坐上位，喺街上人問你安。
你哋有禍咯！因為你好似隱藏嘅墳墓，喺上面行嘅人都唔知到呀。」
有一個教法師答佢話：「老師，你講呢的說話，亦係羞辱我哋咯。」
耶穌就話：「你哋教法師都有禍咯！因為你𢬿難擔嘅責任俾人擔，自己就一隻手指都唔摩吓。
你哋有禍咯！因為你建做先知嘅墳墓，即係你哋祖宗所殺嘅。
噉樣你係做見證嘅，又係歡喜祖宗所做嘅咯；因為你祖宗殺個的先知，你又建做佢嘅墳墓。
故此智慧嘅上帝有話：或作上帝嘅智慧有話，『我將打發先知共使徒去佢個處，其中有的被佢殺死，有的被佢逼害嘅。』
令開闢以來所有流先知血嘅罪，要為呢代人是問。
自亞伯嘅血起，至到撒加利亞死倒殿共壇中間嘅血止，我實在話你知，是必為呢代人是問𡃉。
你哋教法師有禍咯！因為你哋奪嘵知識個條鎖匙，自己唔入去，又阻住個的想入去嘅人。」
耶穌喺個處出嚟，個的讀書人共𠵽唎㘔人盤問佢。激佢多講。
埋伏嚟賍佢，想執佢口所講嘅。〔備註：此節原書缺，取自1883《路加傳福音書》（粵語聯合譯本修訂本，香港教育大學）〕