路加福音 13 · 1883《路加福音傳》（粵語聯合譯本修訂本，香港理工大學）

個陣時同埋喺處嘅、有的人話耶穌知、彼拉多𢬿加利利人嘅血、混雜喺佢嘅祭物處。

耶穌答佢哋話、因為呢的加利利人、受噉嘅害、你就估佢嘅罪、越發大過眾加利利人咩。

我話你哋知、唔係、若你哋唔悔改、大眾亦必噉樣滅亡呀。

從前西羅亞㙮跌嘵、磧死十八個人、你哋估個的人、比較凡喺耶路撒冷住嘅越發有罪咩。

我話你哋知、唔係、若你哋唔悔改、大眾亦必噉樣滅亡呀。○

耶穌就講呢的譬喻話、有個人、𢬿無花果樹、種落佢嘅菩提園、後來嚟到、喺樹上搵果子、唔搵得倒。

就對看園嘅人話、我三年都嚟、喺呢棵無花果樹搵果子、總唔搵得倒、斬嘵佢喇、做乜俾佢廢嘵個的地呢。

看園嘅答話、主、今年由得佢、等我周圍掘鬆嚟培糞。

或者結果、倘若冇、然後致斬嘵佢喇。○

當安息日、耶穌喺一間會堂教緊人。

喺個處、有個女人被鬼迷、病嘵十八年、背駝總唔伸得直。

耶穌睇見、就叫佢嚟、對佢話、婦人呀、你嘅病解用咯。

就𢬿隻手按吓佢、個女人即時伸得直腰、歸榮上帝。

管理會堂嘅、睇見耶穌當安息日醫人、就好惱、答大眾話、有六日應該做工夫、個六日嚟受醫、但安息日就唔好嚹。

主答佢話、偽善嘅人呀、當安息日、你哋邊個唔喺欄裏頭、解佢嘅牛或驢、拉去俾水佢飲呢。

何况呢個婦人、係亞伯拉罕嘅後裔、撒但已經綁住佢十八年、唔應當喺安息日、解用佢嘅結咩。

耶穌講出呢的事、個的對敵嘅人、大家都見羞愧、但群眾因耶穌做咁多榮顯嘅事、就好歡喜。○

所以耶穌話、上帝嘅國、好似乜野呢、又𢬿乜野嚟比佢呢。

好比一粒芥菜種、被人𢬿嚟撒落佢嘅園、長大起嚟、成嘵一棵樹、個的空中嘅雀鳥、住在佢枝上呀。

又話、我𢬿乜野嚟比上帝嘅國呢、

好比酵種、有女人𢬿嚟藏落三斗麵粉裏頭、等佢發起嘥酵嚟。○

耶穌向住耶路撒冷去、經過各城各鄉、一路教訓人。

有個人對耶穌話、主呀、得救嘅人係少咩。

耶穌對佢哋話、盡力爭入窄門喇、我話你哋知、因為好多想入唔入得嘅呀。

及家主起身閂埋門之後、你哋企倒外出打門話、主呀、開門過我哋喇、佢將答你哋話、我唔知你哋喺邊處嚟嘅。

個陣時、你哋就噲話、我哋也曾喺你面前飲食、你亦喺我哋街上教訓。

佢將話、我話你哋知、我唔知你喺邊處嚟嘅、你眾行惡嘅人、離開我去喇。

你睇見亞伯拉罕、以撒、雅各、與及眾先知、都喺上帝嘅國、惟獨自己被趕逐出外個時、就必定咬牙切齒嚟啼哭咯。

喺東邊西邊、南邊北邊、將有人嚟喺上帝嘅國坐席。

但有的尾後嘅人、將做先頭、先頭嘅人、將做尾後呀。○

個陣有的法利賽人、嚟對耶穌話、你離開呢處去喇、因為希律想殺你呀。

耶穌對佢哋話、你去話過個隻狐狸知、今日明日、我要趕鬼醫人、到第三日、我就完全咯。

雖然係噉樣、今日明日及後日、我必要行咯、因為先知、唔得在耶路撒冷之外死亡𡃉。○

耶路撒冷呀、耶路撒冷呀、你係殺個的先知、𢬿石矴個的奉命到你處嘅、我已經幾多次想聚集你子民、好似雞乸聚集雞仔喺翼下一樣、但係你唔肯。

噉就你哋嘅屋、將留落為廢地嘅、我話你哋知、從今以後、你哋唔再見我、等到你哋話、托主名嚟嘅有福個時囉。