當時有好多收稅嘅共罪人嚟近耶穌處，聽佢講。
𠵽唎㘔人共讀書人譏彈耶穌話：「佢接納個的罪人，同埋食飯呀。」
耶穌對佢哋講呢個譬喻話：
「你哋之中，邊個人有一百隻羊，失嘵一隻，唔留落個九十九隻喺曠野，就去揾個隻失嘵嘅，至到揾倒呢？
揾倒，就好歡喜托上佢膊頭。
番到屋企，就請埋朋友共鄰舍嚟，對佢哋話：『同埋我歡喜喇，因為我揾番失嘵個隻羊咯。』
我話你哋知，好似噉樣，有一個罪人悔改，在天上亦必為佢歡喜，多過為九十九個義人唔使悔改𡃉。
抑或邊個女人有十個銀錢仔，失嘵一個，豈唔點着燈，打掃屋裏，子細嚟揾，至到揾倒咩？
揾倒，就請埋朋友、鄰舍嚟話：『同埋我歡喜喇，因為我揾番失嘵個銀錢仔咯。』
我話你哋知，好似噉樣，有一個罪人悔改，在上帝嘅天使面前都為佢歡喜呀。」
又話：「有一個人有兩個仔。
個細仔對父親話：『亞爸，𢬿我所應得嘅家業分過我喇。』個父親就同兩個仔分開家業。
冇幾多日，個細仔聚埋所有嘅野，去好遠地方遊耍，喺個處好放蕩，花散佢嘅家業。
佢一的都散清之時，個處地方有大饑荒，佢就冇得使。
噉就去投靠個處地方一個人，個人打發佢去佢嘅田餵豬。
佢想𢬿豬所食嘅豆殼嚟充饑，都冇人俾野佢食。
個陣時，佢醒悟起嚟話：『我父親咁多工人，佢糧食都有剩，但我喺呢處餓到要死咯。
我將起身去到我父親處，對佢話：亞爸，我得罪天，又得罪你，
從今以後唔敢當做你嘅仔，俾我做你一個工人罷喇。』
噉就起身歸到佢父親處。重離好遠，佢父親睇見就可憐佢，走前去抱住佢頸，共佢親嘴。
個仔就對佢話：『亞爸，我得罪天，又得罪你，從今以後唔敢當叫做你嘅仔咯。』
佢父親對個的僕話：『即刻攞至好嘅長衫俾佢着，攞戒指戴落佢手指，攞鞋着落佢脚。
拉個隻肥牛仔去劏，等我哋快樂嚟食，
因為我呢個仔死嘵又番生，失嘵又得番𡃉。噉。』就佢哋起首快樂。
但佢個大仔喺田處，及至番嚟，將近到屋，聽聞作樂跳舞嘅聲，
就叫一個後生嚟，問吓係乜野事幹。
呢個後生對佢話：『你細佬番嚟，你父親因為得番佢冇病痛，所以劏嘵個隻肥牛仔。』
個大仔就惱起嚟，唔肯入去。佢父親出嚟勸佢，
佢就答個父親話：『我服事你咁多年，總冇背逆你嘅吩咐；你都未曾俾一隻羊仔過我，等我共朋友同埋快樂。
惟係你呢個仔，同妓婦吞嘥你嘅家業，佢一到，你就為佢劏個隻肥牛仔唎咩？』
個父親對佢話：『我嘅仔呀，你時時同埋我，我所有嘅野一的都係你嘅哩。
但你呢個細佬死嘵又復生，失嘵又揾番嘅，故此我哋應該歡喜快樂嚹。』」