路加福音 20 · 1883《路加福音傳》（粵語聯合譯本修訂本，香港理工大學數據）

有一日、耶穌在殿堂教緊百姓、傳福音之時、眾祭司長共讀書人、及長老、嚟問佢話。

請你話我哋知、你𢬿乜野權柄嚟做呢的事、又乜誰賜呢的權柄過你呢。

耶穌答佢哋話、我亦問你哋一句、請你話我知。

約翰嘅洗禮、係由天嚟、抑或由人嚟嘅呢。

個的人私吓斟酌話、若話係由天嚟嘅、佢必定問、做乜你哋唔信佢呢。

若話係由人嚟嘅、眾百姓必𢬿石頭嚟矴、我哋、因為佢哋都信約翰係先知呀。

就答耶穌話、我哋唔知由邊處嚟呀。

耶穌對佢哋話、我都唔話你知、我𢬿乜野權柄嚟做呢的事。○

就對百姓講呢的譬喻話、有個人種嘵一個菩提園、租過耕種人、自己去別處地方好耐。

到期、打發一個僕、去個的耕種人處、等佢哋納園中嘅果俾佢、但耕種人打佢、令佢空手番去。

再打發第二個僕去、個的耕種人亦打佢、而且凌辱佢、令佢空手番去。

更打發第三個僕去、個的耕種人打傷佢、趕逐佢添。

園主就話、我要點樣做呢、要打發我所愛嘅仔去、或者佢哋恭敬佢咯。

但個的耕種人睇見佢、就彼此勘酌話、呢個係承受家業嘅仔、我哋嚟殺死佢、等個的家業歸我哋咯。

噉就趕佢出菩提園外殺嘵、園主點樣處置佢哋呢。

必定嚟到、剿滅個的耕種人、𢬿個園交托別人咯。個的聽見嘅人就話、唔好有噉嘅事呀。

耶穌睇住佢哋話、聖經所寫、起屋師傅所丟棄嘅石、做嘵屋角第一嚿石、係點解呢。

凡跌落呢嚿石上嘅人、必定損傷、但呢嚿石跌落佢身上嘅、是必磧碎佢咯。

個陣時、大眾讀書人共祭司長、知到耶穌講呢的譬喻、係指佢哋、就想捉佢、但係怕百姓呮。○

就靜靜𥅾佢、打發探子假扮做義人、等執佢嘅說話、解佢去總督處處治佢。

探子就問耶穌話、老師、我哋知你所講所傳嘅、俱係正道、你唔𢬿外貌嚟取人、乃係真實嚟傳上帝嘅道。

我哋納稅過該撒、著唔著呢。

耶穌知到佢哋嘅詭計、就對佢哋話、做乜你哋試我呢。

俾個銀錢仔我睇吓、個相頭共國號、係乜誰嘅呢。佢哋答話、係該撒嘅。

耶穌對佢哋話、噉就𢬿該撒嘅物件、納過該撒𢬿上帝嘅物件、納過上帝喇。

個的探子喺百姓面前、唔執得佢嘅說話、而且驚奇佢嘅應對、就冇聲出。○

個的(口撒)吐𡀲人、話人冇復生嘅、其中有的嚟問耶穌話。

老師、摩西寫落書嚟指示我哋噉話、倘若人嘅兄弟有妻、冇仔就死嘵、佢嘅兄弟、要娶佢嘅妻、生仔嚟承繼佢。

從前有七個兄弟、至大嘅娶妻、冇仔就死嘵。

第二嘅娶佢嘅妻、又冇仔死嘵。

第三嘅又娶佢、至到第七嘅都娶過佢、俱冇仔生落死嘵。

收尾個女人亦死。

在復生之時、個女人做佢哋邊個嘅妻呢、因為呢七個都娶過佢咯。

耶穌答佢哋話、呢世嘅人、有嫁有娶呮。

惟係堪得到個世、及由死者之中復生嘅、就冇嫁冇娶咯。

以後不能再死、因為佢好似天使、又係上帝嘅仔、就係復生嘅人咯。

講到死人復生嘅事、摩西在荊棘篇有講咯、佢稱主做亞伯拉罕嘅上帝、以撒嘅上帝。雅各嘅上帝。

但上帝唔係死者嘅上帝、乃係生者嘅上帝、因為眾人在佢面前、都係生嘅呀。

有的讀書人答佢話、老師、你講得著咯。

後來就冇人敢盤問佢。○

耶穌對眾人話、人哋點話基督係大闢嘅子孫呢。

喺詩篇中、大闢自己講、主對我嘅主話、

坐倒我右邊、等我𢬿你嘅仇敵、做你嘅腳踏凳。

大闢既然稱基督做主、噉基督點樣係大闢嘅子孫呢。○

眾百姓聽講個時、耶穌對門生話。

提防個的讀書人呀、佢哋好著長衫、出去遊行、又歡喜喺市上請安、喺會堂坐大位、喺筵席坐上位。

但係佢吞寡婦嘅家業、假意做長長祈禱、佢哋將來受刑罰、是必更重呀。