路加福音 22 · 1872《路加福音傳》（香港教育大學數據）

除酵節，又叫做踰越節，係將近咯。

大眾祭司長讀書人，商量點樣殺得耶穌，但係怕百姓呮。

十二使徒之中，有一個加畧人，名叫猶大，撒但入嘵佢心。

佢就去同大眾祭司長，及各官斟酌，點樣交得耶穌過佢地。

佢地就歡喜，約定俾銀過佢。

猶大應承嘵，就揾機會，𥅾眾人唔喺處，交耶穌過佢地。

除酵日，即係要劏踰越節羊仔嘅日。

耶穌打發彼得共約翰話，你去為我地預備踰越節嘅筵席，等我地食喇。

佢地就對佢話，你想我地喺邊處預備呢。

耶穌對佢話，你入城個時，必有一個擰住水埕嘅人遇着你，佢所入嘅屋，你就跟佢入。

對個家主話，先生問你，人客嘅房喺邊處呢，我將共我嘅門生，喺處食踰越節嘅筵席呀。

佢必俾一間擺設齊整嘅大樓過你睇，你就喺個處預備喇。

佢地去，果然遇着照依耶穌對佢所講嘅，就預備踰越節嘅筵席。

個時候既到，耶穌同埋十二個使徒坐席。

耶穌對佢地話，我受難之先，好想同你地食呢個踰越節嘅筵席。

我話你地知，我唔再食呢個節嘅筵席，等到呢的事，應驗在上帝國致食咯。

就擰起酒杯嚟感謝話，將呢的分俾你地大家飲喇。

我話你地知，我唔再飲菩提汁，等到上帝國嚟致飲咯。

耶穌又擰起餅嚟感謝，擘開俾佢地話，呢的係我嘅身，為你地捨去嘅，你要做呢件事嚟記念我。

食完節筵，擰起隻杯，亦係噉樣話，呢隻杯係新約，在我嘅血，代你地流𡃉。

但係賣我嘅人，佢嘅手同我喺席上咯。

人子去世，係照先頭所定嘅噉，但係賣人子嘅，佢有禍咯。

眾人彼此相問，我地之中，乜誰噲做呢件事呢。

門生彼此爭論，喺佢地之中邊個做大。

耶穌對佢地話，異邦之君王，管理佢嘅百姓，揸權柄嘅，人稱為恩主。

但你地唔好噉樣，你地之中做大嘅，應該好似細嘅，做頭人嘅，應該好似做使喚嘅噉。

邊個係大呢，係坐席上嘅，抑或係使喚嘅呢，豈吾係坐席嘅大咩，但我喺你地之中，好似使喚嘅人噉呀。

你地常時同我，喺我嘅患難之中。

我𢬿國封你地，好似我父封我噉。

等你地喺我嘅國，坐倒我席上飲食，而且坐倒高位，審判以色列族十二支派。

主又話，西門呀，西門呀，撒但也曾想得你地嚟篩，好似篩麥噉。

但我已經為你祈禱，等你嘅信德唔失嘥，而且你歸正之後，要堅固你嘅兄弟。

彼得對佢話，主呀，我肯同你去坐監，又同埋你死。

耶穌話， 彼得呀，但我話你知，今日雞啼之先，你將三回話唔識我。

耶穌對門生話，我打發你，唔使帶荷包，唔使帶細袋，唔使帶鞋嘅時候，你地有缺乏冇呢。答話，冇呀。

就對佢地話，如今有荷包嘅要帶去，有細袋嘅都係噉，冇刀嘅，就要賣嘵衫嚟買一把嚹。

我話你地知，聖經所寫，人地算佢係罪犯嘅人，個句說話，是必應在我身上，因為所指着我嘅事，必要成就嘅。

門生話，主呀，有兩把刀喺呢處咯。耶穌對佢地話，够咯。

耶穌出嚟，仍舊去橄欖山，佢嘅門生，亦跟隨佢。

到嘵個處，就對門生話，你地祈禱喇，免致入誘惑呀。

就離開佢地，大約擗一嚿石咁遠，跪倒處祈禱。

話，父呀，你若係肯，就𢬿呢隻杯離開我，但唔係成就我嘅旨意，乃係成就你嘅旨意呀。

有一位天使，從天上顯現，壯健耶穌。

耶穌好傷心，越發懇切祈禱，所出嘅汗，好似大滴血噉，跌落地下。

祈禱完，就起身，嚟到佢嘅門生處，見佢地因為憂悶瞓嘵。

就對佢地話，做乜瞓覺呢，起身祈禱喇，免致入誘惑呀。

佢講緊個時，眾人嚟到，十二個門生之中，有一個叫做猶大，佢先頭行，埋到耶穌面前嚟親嘴。

耶穌對佢話，猶大呀，你用親嘴做暗號，嚟賣人子咩。

左右嘅人，見事將近，就對佢話，主呀，我𢬿刀斬佢地好唔好呢。

其中有一人，斬祭司長嘅僕，割嘵佢嘅右耳。

耶穌答話，事幹已經至到噉，由得佢喇，就摩吓個人嘅耳，醫好佢。

耶穌對個的嚟嘅祭司長殿堂官，及長老話，你地擰刀共棍嚟，好似捉賊噉咩。

我日日同埋你地喺殿堂，你唔下手捉我，但如今係你地嘅時候，黑暗嘅權勢咯。

眾人捉住耶穌，拉佢去祭司長嘅屋企，彼得遠遠跟住。

喺兩廊處，有人透着火，同埋坐處靠火，彼得亦坐在佢地之中。

有一個妹仔，見佢對住火坐處，就定眼睇佢話，呢個人也曾同耶穌一處𡃉。

彼得唔認就話，女子呀，我唔識佢。

歇一陣，第二個人睇見佢話，你都係佢地一黨[口手力]。彼得話，朋友呀，我唔係噃。

再歇一點鐘咁耐，又第二個男人指實佢話，呢個人真係同埋佢𡃉，因為佢係加利利人。

彼得話，朋友呀，我唔知你講乜野。講緊個時，雞就啼咯。

主回頭睇住彼得，彼得記起主對佢所講，話，雞啼之先，你將三回話唔識我。

噉就出去，哭得好深傷。

揸住耶穌嘅人，戲弄佢打佢。

揞住佢嘅眼，摑佢嘅面，問佢話，你係先知，就話明乜誰打你吖。

又講好多說話添，嚟褻凟耶穌。

到天光，民間嘅長老，大眾祭司長，及讀書人，聚埋一處，拉耶穌嚟到佢地嘅公所。

話，你真係基督，就話我地知。

耶穌對佢話，我若話你地知，你地唔信我，若問你，你都唔答我，又唔肯放我。

自後，人仔將坐倒全能上帝嘅右邊咯。

眾人話，噉你係上帝之子咩。耶穌對佢地話，你地話得着咯，我真係𡃉。

大眾就話，我地重要揾乜野證據呢，因為我地已經聽見佢親口講嘅咯。