路加福音 24 · 1872《路加福音傳》（香港教育大學數據）

當七日期嘅第一日，清早時，個的女人，帶埋佢所整定嘅香料，嚟到墳墓，又有的女人同埋佢嚟。

睇見個嚿石，已經喺墳墓處轆開。

佢地入去，唔見嘵主耶穌嘅屍。

因呢的事，正在疑惑個時，有兩個人，企倒側邊，衣服好光嘅。

個的女人好慌，佢嘅面蹼倒地下，個兩個人對佢地話，做乜喺死人之中揾生人呢。

佢已經番生咯，唔喺呢處咯，你要記憶佢喺加利利個時，對你地講過嘅。

話，人子必定解過罪人嘅手，釘在十字架，第三日就番生。

個的女人，記起耶穌嘅說話。

從墳墓處番去，𢬿呢的事，報過十一個使徒，及眾同伴嘅人知。

個的嚟報過使徒知嘅，即係抹大拉嘅馬利亞，雅各嘅老母馬利亞，及約亞拿，又有同伴嘅女人添。

使徒以為佢嘅說話虛假故此唔信佢。

彼得起身，走到墳墓，噁低頭，睇見個的幼細麻布，擠埋一邊，就去歸，佢心中好詫異呢件事。

個一日，有兩個門生去一條村，名叫以馬迕，離耶路撒冷二十五里咁遠。

呢兩個人，談論所遇着嘅事。

佢地談論個時，耶穌自己嚟近，同埋佢行。

呢兩個人，眼見昏花，唔認得佢。

耶穌對佢地話，你地同行個時，面帶憂愁，談論乜野嘅事呢。

個一個名叫革流巴答佢話，你在耶路撒冷做客，獨唔知個處近日所有嘅事咩。

耶穌對佢地話，乜野事呀，佢地對佢話，論及拿撒勒人耶穌嘅事，佢係個先知，在上帝共眾百姓面前，說話行為，都有大能𡃉。

我地嘅大眾祭司長及官府，解佢去定死罪，釘佢在十字架處。

但呢個人係我地平日所望噲贖以色列民嘅，呢的事做成，如今已經三日咯。

而且我地之中，有幾個女人令我地驚奇，佢地清早到墳墓，

唔見嘵耶穌嘅屍。番嚟就話，已經睇見天使顯現，話耶穌番生咯。

我地之中，有幾人去到墳墓，果然所遇着，照依個女人所講嘅，獨係唔見耶穌呮。

耶穌對佢地話，無知識嘅人呀，你地嘅心，做乜咁遲慢信先知所有講嘅說話呀。

基督唔係應該受呢的難，而且入到佢嘅榮耀咩。

噉就自摩西起，至到眾先知止，但凡聖經所寫，嚟指佢自己嘅，一的都同佢詳細解明。

將到佢地所去個條村，耶穌好似重要行遠的噉。

個兩個人，勉強留佢話，已經挨晚時候，熱頭上下落咯，請你同我地歇宿罷咯，耶穌就入去，共佢地歇。

同埋佢地坐席個時，耶穌擰餅嚟祝謝，擘開分俾佢地。

佢兩人嘅眼就明番，認得耶穌，忽然耶穌唔見嘵。

佢兩人相講話，在路上同我地談論，而且詳解聖經個時，我地嘅心，豈係唔熱咩。

佢地即時起程，番去耶路撒冷，見十一個使徒，及個的同伴嘅人聚集。

話，主果然番生，現出過西門睇咯。

呢兩人又講起路上所遇着嘅，及因為分餅認得佢係耶穌嘅事。

大眾講緊呢的事，耶穌自己企倒佢地之中，對佢地話，願你地平安。

門生就好驚慌，思疑所見嘅係魂。

耶穌對佢地話，做乜你地咁驚慌，做乜個心咁疑惑起嚟呢。

睇吓我手我脚，就知到係我哩，試摩吓我，就睇出咯，因為魂冇骨肉，好似你地見我有噉嘅。

講緊呢的，就𢬿手脚俾佢地睇。

門生因為歡喜到極，倒轉唔信，見咁出奇。耶穌就對佢地話，你地呢處有食物冇呢。

佢地就𢬿一件煎魚， 及一塊蜜房俾佢 。

耶穌當佢地面前擰嚟食。

對佢地話，我平日同埋你地喺處，已經講過，即係話摩西嘅律法，先知嘅書，及詩篇所載，指着我嘅，都必定應驗。

就開佢地嘅心思，令佢明白聖經

又對佢地話，聖經有話，基督應該噉樣受難，到第三日，由死者之中番生。

令人托佢嘅名，傳悔攺赦罪嘅道理，自耶路撒冷起，至到萬國。

你地為呢的事做證人咯。

我將打發我父親所應承嘅，降臨到你，你應該喺耶路撒冷城居住，等到自天上賜權柄過你地呀。

耶穌帶佢地去到伯大尼，遞起手嚟祝福佢。

祝福個時，離開眾人，就升上天。

眾人崇拜佢，好歡喜番去耶路撒冷。

又時時喺殿堂，讚美祝謝上帝。