路加福音 7 · 1867《路加傳福音書》（香港教育大學數據）

耶穌教訓百姓講完，就入迦伯農。

有個百把總佢個所愛嘅僕病到上下死。

聽見論及耶穌，就打發猶太人嘅長老，去求耶穌嚟，醫佢嘅僕。

長老見耶穌，就懇求佢，話：𢬿個件事施俾嗰個人，係堪當駕。

因為佢愛惜我地百姓，替我地起會堂添。

耶穌同埋個的人去。離屋冇幾遠個時，個百把總打發佢嘅朋友嚟見耶穌，話：主，唔使勞動咯，你到我茅舍，我唔堪當。

所以我又估自己唔堪嚟見你；但求你話一句，我嘅僕就必定得好嘅咯。

因為我都係屬人權下，亦有兵屬我權下，吩咐呢個：去！就去；吩咐嗰個：來！就來；叫我嘅僕：做呢件事！就做呢件事咯。

耶穌聽見呢的說話，就見出奇，[口佞]轉頭，睇吓跟隨佢嘅人，話：我話你知，喺以色列人中間，唔曾見過噉樣嘅信德呀。

受打發嘅人番去歸，個時睇見有病嘅僕，佢已經好嘵咯。

第二日，耶穌入到一個城，名叫拿因；帶住學生共眾人同埋行。

近城門口，有人抬個死人出嚟，佢老母獨係生到嗰個仔呮，又係寡母婆添；城裡嘅百姓好多都去送喪。

主睇見嗰個寡母婆，就憐恤佢，話：唔使啼哭。

就行前去，㩒住副棺材；個的抬棺材佬就止住，耶穌話：後生仔，我吩咐你，起身。

個死者就起身，坐倒處，講說話。耶穌𢬿嗰個俾番佢老母。

眾人就慌起嚟，稱讚上帝，話：有大嘅先知生在我地中間，上帝照顧佢嘅百姓咯。

噉就個的說話傳揚喺猶太與及周圍地方。

約翰嘅學生，𢬿個的事去，話過佢嘅先生知。

約翰就叫兩個學生，去見耶穌，話：應當嚟嘅，就係你咧咩，抑或重愛望第二個人呢？

嗰兩個人就去見耶穌，話：施洗禮嘅約翰打發我嚟見你，問吓，應當嚟嘅即係你，抑或重要望第二個人喎？

個陣時耶穌醫好多人嘅病症，及被惡神迷嘅，又俾好多盲眼佬睇得見。

就答，佢話：𢬿你睇見嘅聽見嘅去，話俾約翰知，如同盲嘅睇得見，跛嘅噲行，發瘋嘅得乾淨，聾嘅聽得見，死嘅翻生，窮嘅得聽福音。

凡係喺唔嫌棄我嘅有福咯。

約翰打發嘅人已經去，耶穌就𢬿約翰，對眾人話：你出荒野，想睇乜野呢？想睇個的風吹個的盧荻草咩？

你出去想睇乜野呢？想睇個的着好衣裳嘅人咩？但個的好食好着嘅人係喺王宮裡頭呀。

然則你出去，想睇乜野呢？先知者咩？我話你知，係大過先知者添呀！

聖經有寫：我打發我嘅差人喺你面前，喺你嘅前預備你嘅路，就係指着嗰個人咯。

我話你知，夫娘所生嘅，冇個先知者大過施洗禮嘅約翰呀；但喺上帝國，細嘅都大過佢。

大眾百姓聽佢，又收稅嘅官，稱上帝嘅義，受約翰嘅洗禮

但𠵽唎㘔人及教律法嘅先生忤逆上帝為佢所有嘅主意，唔受約翰嘅洗禮。

主話：呢下世界嘅人，好比乜野，好似乜野呢？

好比細蚊仔坐倒街市上，大家叫喊，話：我吹簫，你唔跳舞；我唱悲切嘅歌，你唔啼哭。

施洗禮嘅約翰嚟，唔食餅，唔飲酒，就你話：佢被鬼迷。

人嘅仔嚟，又飲又食，就你話：收稅官犯罪人嘅朋友。

但個智慧由喊唪唥佢嘅仔得稱義。

有個𠵽唎㘔人請耶穌食飯，耶穌入佢屋企，坐席。

城裡有個女人，平日唔好品行嘅；知到耶穌坐倒𠵽唎㘔人屋企，就擰個玉盒仔，裝的香膏，

喺耶穌腳後啼哭，眼淚流濕耶穌嘅腳，𢬿自己嘅頭髮去抹，又俾嘴去啜耶穌嘅腳，俾香膏搽佢添。

請耶穌食飯嗰個𠵽唎㘔人，睇見個的，心裡頭就噉話：呢個人若係先知者，就事必知摸佢嗰個係乜野人咯；因為嗰個女人品行唔好。

耶穌答佢話：西門，我有的事話你知。西門話：先生，請講喇！

耶穌話：有個債主，有兩個債仔，一個欠五十兩銀，一個欠五兩銀。

因為無得還，債主就都免嘵佢嘅，你試話，佢兩個邊個愛個債主多呢？

西門答話：我估嗰個免得多嘅。耶穌對佢話：你估嘅着咯。

耶穌就轉頭睇住嗰個女人，對西門話：你地睇見呢個女人啦？我入你屋企，你唔曾𢬿水洗我嘅腳；但個女人俾眼淚洗濕我嘅腳，俾佢嘅頭髮抹番乾。

你唔曾啜我嘅嘴；但呢個女人自從我入嚟，就唔停啜我嘅腳。

你唔曾𢬿膏，搽我嘅頭；但呢個女人𢬿香膏搽我嘅腳。

所以我話你知，嗰個女人罪惡多，我赦嘵佢嘅，因為佢愛係多；但個的赦得少嘅，就佢愛亦係少。

就對個女人話：你嘅罪得赦咯。

同席嘅人私下講，話：「呢個係乜野人，可以赦人地嘅罪呢？

耶穌對個女人話：你嘅信得救呢，可以安安樂樂去歸咯。