耶穌叫佢十二個門生嚟，賜佢哋有權，能趕逐邪鬼，而且醫各樣疾病。
十二使徒嘅名字，開列於左，頭一個係西門，又叫做彼得與及佢兄弟安得烈，西比太嘅仔雅各，與及佢兄弟約翰。
腓力，與及巴多羅買，多馬，與及稅吏馬太，亞勒腓嘅仔雅各，與及達太。
銳教嘅西門，與及賣耶穌嘅加略人猶大。
耶穌打發呢十二人，吩咐佢哋話，異邦嘅路咪行，撒馬利亞嘅城咪入。
寧可去以色列家失羊個處。
你哋去個時，就傳講噉話，天國係近咯。
醫好有病嘅，令死嘅復生，整乾淨痳瘋嘅，又將邪鬼趕逐，你白白得嚟嘅，亦要白白施出去。
唔使預備金銀及銅錢喺你腰帶。
或行路嘅袋，或兩件衫，或鞋，或枴杖，因為工人應該得糧食呀。
但凡你入到嘅城，或村鄉，就訪問邊個係好人，就同佢住，住到你哋離開個處。
你入到人家，要替佢求安。
佢個家倘若係好嘅，你所求嘅平安，必降臨佢，倘若係唔好嘅，你所求嘅平安，仍然歸番自己。
但凡唔招接你，唔聽你說話嘅，你離開佢家，或城，拍去你腳下塵埃。
我實在話你哋知，當審判日子，所多馬與及蛾摩拉嘅刑，比之呢個城嘅重易受呀。
我打發你哋，好比羊咩入豺狼之中，故此當要蛇咁精，白鴿咁善。
要提防世人，因為佢必解你去議事公會，喺佢哋會堂鞭你。
你哋必為我嘅緣故，被解到侯王處，嚟做個的人及異邦人嘅證據。
解你哋個陣時，唔使憂慮點樣講，或講乜野，因為到個陣時，必賜過你講呀。
因為唔係你自己講，係你父嘅聖神，喺你裏頭講呀。
兄弟必解兄弟置於死地，父親待仔亦係噉樣，仔女必要攻擊父母，令佢受死。
又你哋為我嘅名，必受眾人憎惡，惟係忍耐到底嘅，佢必得救呀。
有人喺呢個城迫害你，就走去別個城，我實在話你哋知，以色列咁多城，你都未曾行得勻，人子必定到咯。
學生唔好得過老師，奴僕唔好得過主人。
學生比得到老師，奴僕比得到主人，足矣咯，倘若佢哋叫家主做別西卜，（別西卜係鬼王之名）何况佢嘅家人呢。
故此唔使怕佢哋咯，因為冇的藏埋嘅唔露出，冇的隱埋嘅唔顯現呀。
我喺幽暗處話你哋知嘅，你必要在光明處講出嚟，你喺耳邊聽嘅，你必要在屋上宣傳出嚟。
殺得肉身，唔殺得靈魂嘅，唔使怕佢哋，寧可怕能滅靈魂，與及肉身喺地獄嘅。
兩隻麻雀，唔係賣得一分銀致咩，若你父唔准，佢就一隻都唔跌得落地。
但係你哋嘅頭髮，都盡哋數過嘅。
故此唔使慌，你哋貴重過好多麻雀呀。
但凡喺人面前認我，我亦喺天父面前認佢。
但凡喺人面前唔認我，我亦喺天父面前唔認佢咯。
咪以為我嚟，係令地上太平，我嚟唔係令佢太平，反轉興動刀劍呮。
因為我嚟，令人疏離父親，女仔疏離母親，媳婦疏離家婆。
人嘅仇敵，就係自己嘅家人咯。
愛父母多過我嘅，與我唔相宜呀，愛仔女多過我嘅，與我唔相宜呀。
而且唔將佢十字架跟從我嘅，亦與我唔相宜呀。
搵倒佢生命嘅，必定喪失，因我至到喪失佢生命嘅，必定得番。
招接你哋嘅，即係招接我，招接我嘅，即係招接打發我嚟嘅呀。
因先知嘅名，嚟招接先知，必得先知嘅賞賜，因義人嘅名，嚟招接義人，必受義人嘅賞賜。
呢的小子之中一個，因門生嘅名，不過𢬿一杯凍水俾佢飲，我實在話你哋知，個人必定唔失佢嘅賞賜咯。