個陣時，分封嘅國王希律，聞得耶穌名聲。
就對佢臣子話，呢個係施洗禮嘅約翰，佢由死復生嘅，故此做出奇能呀。
先時希律因佢兄弟腓力嘅妻，希羅底緣故，捉約翰綁住，困入監裏。
因為約翰曾對佢話，你有呢個婦人唔著呀。
希律想殺佢，但係怕眾人，因為眾人當佢係先知。
適値希律生日，希羅底嘅女，在眾人之前跳舞，令希律歡喜。
希律就發起誓嚟，應承佢求乜野都賜過佢。
佢聽老母嘅囑咐，就話，[扌成]施洗禮約翰嘅頭，載落盤上，喺呢處賜我。
王就閉翳起嚟，但因已經發誓，又因同席嘅喺處，就吩咐賜過佢。
於是打發人喺監斬約翰。
擠佢個頭落盤，擰嚟賜過個女，女拈嚟佢老母。
佢門生嚟到，執個屍葬埋，去話過耶穌知。
耶穌聞得，就落船離開個笪，出去曠野幽靜之處，眾人聽聞，就由各城步行跟從佢。
耶穌出嚟，睇見大眾，就可憐佢，又醫好佢哋嘅病人。
到挨晚，門生嚟話，呢處係曠野，時候已經過嘵咯，請叫眾人散喇，等佢去各村鄉，為自己買食物。
但耶穌對門生話，佢哋唔使去，你哋俾過佢食囉。
門生對佢話，我哋喺呢處，獨有五個餅，兩條魚呮。
佢話，擰嚟我。
就叫眾人坐倒草處，擰起個五個餅兩條魚，望住天祝謝，就擘開的餅，俾過門生，門生俾過眾人。
噉就大眾都食飽，執起個的食剩嘅咂碎，裝滿十二籃。
個的食嘅，除嘵婦人及細伩仔之外，大約有五千人。
耶穌即時催門生落船先去對面岸，等自己散嘵眾人。
眾人散之後，單獨自己上山祈禱，到夜晚，獨剩自己喺處。
船在海心，被浪搖動，因係風𠸺呀。
夜晚四更個時，耶穌行海面，去到佢哋處。
門生睇見佢行海面，驚慌話，係怪物呀，噉就慌到叫喊起嚟。
耶穌即時對佢哋話，你哋放心喇，係我呮，唔使怕。
彼得答佢話，主呀，若係你，就叫我在水面嚟到你處。
耶穌話，嚟喇，彼得就喺船落去，行水面埋去耶穌處。
但係見風猛，就怕起嚟，將近沉之時，就喓話，主呀，救我呀。
耶穌即伸手拉住佢，對佢話，小信嘅人呀，使乜思疑呢。
佢哋上到船，風就息咯。
個的喺船上嘅，崇拜佢話，你真係上帝之子咯。
佢已經過去，到革尼撒勒地方。
個笪地方嘅人識佢，就使人去到四鄉，將所有病嘅帶嚟佢處。
求耶穌俾佢哋摩吓衫尾呮，所有摩嘅都得好番。