個陣時，有法利賽人，與及讀書人，由耶路撒令嚟耶穌處，話。
做乜你門生犯古人嘅遺傳呢，因為佢未洗手就食飯呀。
耶穌答佢哋話，你做乜將你嘅遺傳，嚟犯上帝嘅誡命呢。
因為上帝話，孝敬父母，又話，毁謗父母嘅，必要定死罪。
但係你哋話，人若係對父母話，我所應當敬奉你嘅，已經做嘵祭物。
就唔使敬佢父母呀。噉樣，你哋將你嘅遺傳，嚟廢嘵上帝所講嘅咯。
偽善嘅人呀，以賽亞預先講及你哋嘅，係著，佢話。
呢的百姓，𢬿唇嚟恭敬我，但佢個心，離我好遠。
佢哋𢬿人所吩咐嘅嚟傳教，噉佢拜我係徒然呮。
耶穌叫眾人嚟對佢話，你哋要聽，而且要明白呀。
唔係入口嘅，噲污浼人，但係出口嘅，致噲污浼人呮。
於是門生嚟對佢話，法利賽人聞得呢的說話，就厭棄，你知唔知呢。
耶穌答話，但凡樹木，唔係我天父種嘅，是必連根蔃拔起佢。
由得佢喇，佢係盲眼拖人行嘅，若係盲眼拖住盲眼，兩個必定跌落坑處咯。
彼得就答佢話，請解呢個譬喻我哋知吖。
耶穌話，你哋重未明白咩。
豈唔曉得但凡入口嘅，運化在肚，就遺落廁所咩。
但係出口嘅，即係由心出嚟嘅，個的致噲污浼人呀。
因為由心出嘅，有惡念，兇殺，姦淫，私通，偷竊，妄證，褻凟。
呢的係污浼人𡃉，但係未曾洗手嚟食嘅，唔污浼得人呀。
耶穌離開個處，去到推羅西頓境界。
有一個迦南婦人，由個處境界出嚟，喓話，主呀，大闢嘅子孫，可憐我，我女被鬼害，好辛苦。
耶穌一句都唔答，門生嚟到求話，使佢去喇，因佢在我哋後便叫喊呀。
耶穌答話，我受打發嚟，單係為以色列家亡失嘅羊呮。
婦人嚟拜佢話，主呀，幫助我。
但係佢答話，𢬿仔女嘅餅𢫕過狗食，唔好呀。
婦人話，主，係咯，但係狗亦得食佢主人檯下跌落嘅咂碎。
於是耶穌答佢話，婦人呀，你嘅信德大咯，照依你所願嘅，必做成咯，佢嘅女，自個陣時就好番。
耶穌又離開個處。嚟到加利利海邊，上山坐處。
有群眾嚟到佢處，共埋帶住的跛嘅，盲嘅，啞嘅，殘缺嘅，與及各樣病嘅，擠在耶穌腳下，耶穌就醫好佢哋。
眾人見啞嘅噲講，殘缺嘅痊癒，跛嘅噲行，盲嘅噲見，就以為出奇，又歸榮以色列嘅上帝。
耶穌叫佢門生嚟話，我可憐呢的眾人，因佢同我喺處，已經三日，如今冇得食，我唔想使佢肚餓番去，怕喺路上疚癐呀。
門生對佢話，喺曠野，從邊處得咁多餅，致令咁多人食飽呢。
耶穌對佢哋話，你有幾多餅呢，佢哋話，七個，兼有幾條細魚。
耶穌叫眾人坐落地上。
就擰個七個餅，與及的魚，祝謝，擘開俾過門生，門生俾過眾人。
眾人食到飽，執埋餘剩嘅咂碎，裝滿七籃。
個的食嘅，除婦人及細伩仔之外，有四千人。
耶穌叫眾人散嘵，就落船去到馬加單境界。