天光早個時，眾祭司長，與及百姓嘅長老，同謀攻耶穌，想害死佢。
就綑綁起佢，拉佢解去總督彼拉多處。
個陣時，賣佢嘅猶大睇見耶穌定罪，就悔恨起嚟，拈番個的銀三十員過眾祭司長及長老，話，我賣無辜者嘅血，係有罪咯。
眾人話，個的關我哋乜事，你自己當呀。
猶大𢫕個的銀落殿處，就行出去吊頸。
眾祭司長擰住個的銀話，呢的係血價，唔著擠落庫房。
噉就商量，將個的銀買瓦窰人嘅田，𢬿嚟埋葬遠客。
故此個笪田，至到今日，叫做血田。
於是應嘵先知耶利米所講嘅，話，眾人所拈個三十員銀，係被人估値嘅價錢，即係以色列人所估値嘅。
俾嚟買瓦窰人嘅田，係依主吩咐我嘅。
耶穌企倒總督面前，總督問佢話，你係猶太人嘅王咩。耶穌對佢話，你講得著咯。
眾祭司長與及長老告訟耶穌，耶穌總唔答。
彼拉多就對佢話，佢哋𢬿咁多事嚟證你，你唔聽聞咩。
耶穌一句都唔答佢，故此總督見好出奇。
當節期，總督有例，要放一個監犯過百姓，任從佢哋所想。
個陣時，有一個有名嘅監犯，叫做巴拉巴。
佢哋齊集個時，彼拉多問佢哋話，你哋想我放邊個過你呢，巴拉巴抑或耶穌稱為基督嘅呢。
因為佢知到眾人妒忌嚟解耶穌。
總督坐堂個時，佢夫人使人去佢處話，你唔好辦理呢個義人，因我今日夢中，為佢好苦切呀。
但眾祭司長與及長老，唆聳眾人，求放巴拉巴殺耶穌。
總督答佢哋話，個兩個人，你想我放邊個過你呢。大眾話，巴拉巴咯。
彼拉多對佢哋話，然則個耶穌稱為基督嘅，我點樣處置佢呢。佢哋大家話，釘佢落十字架喇。
總督話，佢做過乜野惡事呢。眾人越發喓話，釘佢落十字架喇。
彼拉多睇見講都冇益，不過越發生亂呮，就拈水嚟，向眾人面前洗手，話，流呢個義人嘅血，唔係我嘅罪，你哋自己當呀。
眾百姓答話，佢嘅血歸我哋，與及我哋子孫喇。
於是釋放巴拉巴過佢哋鞭打耶穌，交過人釘佢落十字架。
個陣時，總督嘅兵丁，帶耶穌入公堂，聚埋通營嘅兵嚟佢處。
剝佢嘅衫，俾件紅袍佢著。
𢬿荊棘結成冠冕，載落佢頭處，又擠條蘆荻喺佢右手，又跪倒佢面前嚟侮弄佢，話，請猶太人嘅王安。
又唾佢。攞番個條蘆荻嚟打佢頭。
侮弄之後，就剝番個件袍，替佢著番自己嘅衣服，拉佢去釘落十字架。
佢哋出去個時，遇著古利奈人，名叫西門嘅，強佢孭耶穌個十字架。
佢哋去到一笪地方，名叫做各各他，繙譯即係枯顱頭處。
𢬿酒攪苦膽俾佢飲，佢試一試，就唔肯飲咯。
釘佢落十字架之後，執籌分佢嘅衣服。
兵丁坐倒處，嚟守住佢。
又擠條犯罪嘅標，在佢頭上，冩明話，呢個係猶太人嘅王耶穌。
個陣時有兩個賊，同埋佢釘落十字架，一個在左，一個在右。
行過嘅人褻凟佢，[口佞]吓個頭話。
你噲拆個間殿，三日內又起番嘅，應該救自己哩，倘若係上帝之子，就喺十字架落嚟喇。
眾祭司長與及讀書人，共埋長老，亦噉樣侮弄話。
佢救得別人，唔救得自己，佢係以色列嘅王，如今應喺十字架落嚟，我哋就信佢咯。
佢倚賴上帝，若係上帝歡喜佢，如今就好救佢哩，因為佢話過我係上帝之子呀。
同埋佢釘落十字架嘅賊，亦係噉怒罵佢。
自正午時到未時尾，週圍地方黑暗。
約莫未時尾，耶穌大聲叫話，㕽唎㕽唎，啦嗎撒[口駁]𠯈呢，即係話我嘅上帝，我嘅上帝，做乜遺落我呢。
有的企側邊嘅聽聞，話，佢叫以利亞𡃓。
其中有一人，即時走去，𢬿水[氵抱]浸醋，扎在蘆荻上，遞過佢飲。
其餘的人話，由得佢喇，試睇吓以利亞嚟救佢唔救。
耶穌再大聲喓，氣就斷咯。
忽然間，殿裏嘅布帳，自上至下裂開兩邊。
地震石裂，而且墳墓打開，已經瞓著嘅聖人，好多起番身。
及至耶穌復生後，佢哋出嚟墳墓，入去聖京，現出過好多人見。
百把總與及同守耶穌嘅人，睇見地震，共所經歷嘅事，就好慌，話，呢個真係上帝之子，咯。
個處有好多婦人，即係由加利利跟從服事耶穌嘅，喺遠遠望住。
其中有抹大拉嘅馬利亞，又有雅各共約西嘅母親馬利亞，與及西比太兩個仔嘅母親。
已經挨晚，有個財主嚟，係亞利馬太嘅人，名叫做約瑟，佢亦係耶穌嘅門生。
去見彼拉多求耶穌嘅屍，於是彼拉多吩咐將個屍俾佢。
約瑟攞嘵個屍，𢬿虔潔嘅麻布包住佢。
擠在自己嘅墳墓，喺磐石新鑿嘅，又轆嚿大石在墓門口，就去嘵。
個處有抹大拉嘅馬利亞，與及第個馬利亞坐倒墳墓對面。
明日，即係預備嘅日之後，眾祭司長，同埋法利賽人聚集，去彼拉多處，話。
大人呀，我哋記得個個欺騙人嘅，在生之時，也曾話，三日之後，我必復生。
所以請你吩咐人看緊個墳墓，到第三日，怕佢門生嚟偷佢去，就向百姓話，佢由死復生，噉就在後嘅荒謬，較之在先嘅更關係咯。
彼拉多對佢哋話，你有看守嘅兵，好去喇，盡你嘅力嚟看緊喇。
佢哋就去看緊個墳墓，俾印封住嚿石，設兵看守。