馬太福音 5 · 1882《馬太福音傳》（粵語聯合譯本修訂本，香港理工大學數據）

耶穌睇見群眾、就上個山坐、佢門生嚟佢處。

耶穌就開口教佢哋、話

虛心嘅人有福咯、因為天國係佢嘅國呀。

悲切嘅人有福咯、因為佢必得安慰呀。

溫柔嘅人有福咯、因為佢必得土地呀。

如飢渴愛慕公義嘅人有福咯、因為佢必得飽呀。

可憐人嘅有福咯、因為佢必受可憐呀。

清心嘅人有福咯、因為佢必得見上帝呀。

令人和睦嘅人有福咯、因為佢必得稱為上帝之子呀。

為公義被人迫害嘅人有福咯、因為天國係佢嘅國呀。

你為我受人怒罵迫害你、又𢬿各樣惡事嚟毁謗你、就有福咯。

你應該歡喜快樂、因為你得在天嘅賞賜係大呀、在你哋以前嘅先知、都係噉樣被人迫害咯。○

你係地嘅鹽、倘若鹽失嘵味道、點成得番鹽呢、後來必定冇用、獨係𢫕嘵出外、任人踹踏呮、

你係世上嘅光、一個城起倒山上、係不能遮掩嘅。

人哋點燈、唔𢬿嚟擠倒斗下、惟係擠倒燈臺上、就照住一家嘅人咯。

噉樣你哋嘅光、當要照在人前、令佢睇見你嘅好行為、就歸榮你在天嘅父。○

咪以為我嚟壞律法、與及先知、我唔係嚟廢壞、正係成就佢呀。

我實在話你知、直到天地廢壞、律法一點一畫斷不能廢壞、一的都得成就嘅。

故此但凡毁壞呢的誡命、至微小嘅一條、又教人噉樣做、喺天國必定話佢係至微小、惟係但凡遵依誡命嚟做、及教人嘅、喺天國必定話佢係大咯。

我話你知、倘若你嘅善義、唔勝得過讀書人、與及法利賽人嘅善義、斷唔入得天國。○

你聞得有對過古人話、咪殺人、但凡殺人嘅、就難免審判治罪。

但我話你知、但凡無故惱怒兄弟嘅、難免審判治罪、但凡對兄弟話係拉加嘅、難免公會治罪。但凡對兄弟話係魔利嘅、（拉加、魔利、俱罵人語）、難免地獄嘅火。

故此你若係擰禮物去壇、喺個處記起兄弟有乜野罪執得你。

就留落你禮物喺壇前、先去共你兄弟和好番、然後嚟獻你禮物。

有告訟你嘅、你重共佢喺路上、要急的共佢和好、恐怕告你嘅送你到官、官發你落差、你就被押在監裏咯。

我實在話你知、倘若你一毫一釐未曾還清、斷不能喺個處出得嚟。○

你聞得有話、咪行姦淫。

但係我對你話、但凡睇見婦人就動起淫心、佢心裏已經行姦淫咯。

設使右眼陷你犯罪、就挖嘵𢫕佢、寧可百體失嘵一體、免至全身打落地獄。

設使右手陷你犯罪、就斬斷𢫕佢、寧可百體失嘵一體、免至全身落地獄。

又有話、若係有人出個妻、就要冩分書俾過佢。

但係我對你話、但凡唔係因姦淫嘅緣故出佢妻、就係使佢行淫咯、人若娶個被出嘅婦人、亦係行淫咯。○

你又聞得有對過古人話、你所發嘅誓、唔好違背、對主發誓嘅、必要依番嚟做。

但係我對你話、總唔好發誓、唔好指天嚟誓、因為天係上帝嘅座位呀、

唔好指地嚟誓、因為地係佢嘅、腳凳呀、唔好指耶路撒冷嚟誓、因耶路撒冷係大王嘅京都呀。

又唔好指自己頭嚟誓、因你不能使得一條頭髮、或黑或白呀。

但你哋嘅說話、要是是否否、多過呢的嘅、係由惡發出嚟咯。○

你聞得有話、𢬿眼賠眼、𢬿牙賠牙。

但係我對你話、你咪共惡做對敵、若有人打你右便腮頰、就調轉左便俾佢打。

若有人想告你、取你裏便衣服、連外便衣服、都由得佢取。

有人勉強你行一里路、你就共佢行二里路。

求你嘅就俾過佢、想共你借嘅、咪推辭佢、○

你聞得有話、要愛你嘅鄰舍、憎你仇敵。

但係我對你話、共你做仇敵嘅、要愛佢、難為你嘅、要替佢祈禱。

噉樣就可以做得你天父嘅仔咯、因佢出熱頭嚟照善人及惡人、落、雨喺義人及不義人處呀。

你若係愛個的愛你嘅、有乜賞賜呢、稅吏亦唔係噉樣做咩。

若淨係問你兄弟安、有乜好過人呢、異邦人亦唔係噉樣做咩。

所以你當要做到完全、好似你天父係完全嘅呀。