咪議論人，就唔被人議論你，因為你噉樣議論人，就被人噉樣議論你。
你噉樣量度人，就被人噉樣量度你。
你兄弟眼裏有條莿，你就睇見，你自己眼裏有條杉，你自己都唔見覺，為乜呢。
你自己眼尚且有條杉，點能對兄弟話，你眼有條莿，等我替你擝出嚟呢。
偽善嘅人呀，先要擝出自己眼裏嘅杉，後來致睇得明白，擝出兄弟眼裏嘅莿呀。
咪俾聖物過狗，咪𢫕你嘅珍珠落豬前，恐怕佢𢬿腳嚟踹，而且番轉頭咬你。
你哋求就必俾你，搵就必遇著，打門就必開過你。
因為但凡求嘅就得，搵嘅就遇著，打門嘅就得開呀。
你哋之中，邊個有仔求餅，俾石過佢呢。
或者求魚，俾蛇過佢呢。
你哋雖係惡，尚且知到俾好野過仔女，何况你父在天，有唔𢬿好野賜過求佢嘅咩。
所以你哋但凡想人噉樣待你，你是必要噉樣待人，因為呢的係律法與及先知嘅意思呀。
你應該入個度窄門，因為引人到沉淪處，個度門係闊，個條路係大，又入去個處嘅係多。
但係引人到生活處，個度門係窄，個條路係細，又搵得著嘅係少。
你哋提防個的偽先知，佢嚟你處，外面裝成羊咩噉，裏頭實係殘惡嘅豺狼。
因佢嘅果子，就可以識得佢出哩，喺荊棘，摘得倒菩提子咩，[口系]蒺藜，摘得倒無花果咩。
噉樣，但凡善樹結善果，惡樹結惡果。
善樹不能結惡果，惡樹不能結善果。
但凡樹木唔結善果嘅，就斬嘵𢫕落火處。
故此你因佢嘅果，就識得佢出咯。
但凡稱呼我話，主呀主呀嘅，未必盡入得天國，獨係遵行我天父旨意嘅入得呮。
在個日，好多人將對我話，主呀主呀，我哋豈唔係託你名傳教，託你名趕鬼，託你名行好多奇能咩。
個陣時，我就講明佢知，我唔曾識你哋，你為惡之人，離開我去囉。
所以但凡聽我呢的說話嚟做嘅，我將佢嚟比較有見識嘅人，起佢嘅屋，喺大石之上。
即使雨淋，水浸，風吹，撞個間屋，都唔跌倒，因為基地在大石之上呀。
但凡聽我呢的說話唔做嘅，我將佢嚟比較呆蠢嘅人，起佢嘅屋喺沙上。
雨淋，水浸，風吹，撞個間屋，就跌嘵，而且跌得好交關呀。
耶穌講完呢的說話個時，百姓驚奇佢嘅教訓。
因為佢教大眾，好似有權柄噉，唔同佢嘅讀書人呀。