馬可福音 6 · 1882《馬可福音傳》（粵語聯合譯本修訂本，香港理工大學）

耶穌離開個處、番歸自己家鄉、佢嘅門生跟從佢。

適値安息日、佢喺會堂教人、眾人聽聞、就見出奇、話、呢個人從邊處得倒噉呢、所賜過佢嘅、係點樣智慧、致有咁奇能、喺佢手做出呢。

佢唔係馬利亞嘅仔、做木匠嘅咩、唔係雅各約西猶大西門嘅兄弟咩、佢姊妹唔係同我鄰舍咩。噉就厭棄佢。

但耶穌對佢哋話、凡係先知、除嘵佢家鄉親戚家人、之外無不尊敬佢。

耶穌喺個處、唔做得乜野奇能、不過俾手摩吓幾個病人、醫好佢哋呮

而且怪個的人唔信、就周圍去各鄉教人。○

耶穌叫個十二個門生、就打發佢哋一對對去、賜佢哋有權、能趕逐邪鬼。

又吩咐佢哋擰枴杖之外、唔使帶路費、或糧食、或細袋、或擠銀落腰帶。

獨係著對草鞋、又唔使著兩件衫。

又對佢哋話、唔論邊處、入到人家、就喺個處住、住到你去別處。

如有唔接你、唔聽你嘅、臨去之時、你拍嘵腳下的塵、嚟做佢哋嘅證據。

門生就出去傳道、勸人悔改。

又趕逐好多鬼、𢬿油搽好多病人、嚟醫好佢。

耶穌嘅名聲、傳揚起嚟、希律王聽聞就話、佢係施洗禮嘅約翰、由死復生、故此佢做得出大奇能呀。

有人話佢係以利亞、又有人話、佢係先知、好似古先知中之一。

惟係希律聽聞就話、呢個係我所斬嘅約翰、佢復生(口播)。

個個希律、也曾使人捉約翰困入監裏、因佢兄弟腓力嘅妻希羅底緣故、希律已經娶佢咯。

約翰曾諫希律話、你娶兄弟嘅妻、係唔合呀。

故此希羅底怨恨佢、好想殺佢但唔殺得。

因為希律知約翰係公義、而且聖潔、就敬畏保護佢聽佢所講、多係依住嚟做、又歡喜聽佢講。

啱啱有個機會、即係希律嘅生日、擺設晚席、請各位文武官員、與及加利利尊貴嘅人。

個希羅底嘅女入去跳舞、令希律及同席嘅人、個個都歡喜、王就對個女話、任從你所想嘅嚟求我、我是必俾過你。

而且對佢誓願話、但凡你求我嘅、雖係要我國一半、我必俾你。

個女就出去、問佢老母話、我應該求乜野呢。老母話、施洗禮約翰嘅頭喇。

個女就趕快入去、見王求話、我想你𢬿施洗禮約翰嘅頭、載落盤上、即時賜我。

王好閉翳、但因為已經誓願、又因同席嘅人喺處、唔肯推辭佢。

王即時打發一個兵卒、吩咐佢攞約翰嘅頭、個兵卒就去、喺監裏斬嘵約翰。

擠佢個頭落盤、擰嚟俾過個女、個女轉交過老母。

佢嘅門生聽聞、就嚟執拾佢屍、葬落一墳墓。○

使徒聚埋嚟耶穌處、𢬿所做嘅事、所教嘅道、講嘥佢聽。

耶穌對佢哋話、你哋去曠野幽靜之處、歇息一吓喇、因為來往嘅人多、令佢食飯都唔得閒。

噉就坐船去到曠野幽靜之處。

眾人睇見佢哋去、好多認得耶穌、就喺各城路上走起、先到佢所去個處。

耶穌出去、睇見群眾、就可憐佢哋、因佢好似羊咩冇牧人噉、就𢬿好多道理教佢。

到挨晚時、佢門生對耶穌話、呢處係曠野、如今挨晚咯、

請散眾人、等佢去四便鄉村、自己買野食喇。

耶穌答門生話、你俾野佢哋食囉。門生對佢話、我哋擰二十兩銀去買餅、俾佢哋食咩。

耶穌對門生話、你有幾多餅呢你去睇吓。門生睇過、就話有五個餅、共兩條魚呮。

耶穌吩咐門生、令大眾一隊一隊、坐在草面、

眾人就坐落、或一百一隊、或五十一隊。

耶穌擰起個五個餅兩條魚、望住天感謝、擘開的餅、俾過門生、令佢攞開眾人、面前又𢬿兩條魚分俾眾人。

噉就大眾都食飽。

執起個的餅碎、及食剩嘅魚、足滿十二籃。

共計食嘅有五千人。○

耶穌就催佢門生落船、先過個便岸、到伯賽大、等待自己散嘵眾人。

耶穌既散眾人之後、上山祈禱。

到夜晚、個隻船喺海中、耶穌獨自己喺岸上、

睇見門生掉槳好辛苦、因為(口逆)風呀、個晚約莫到四更時候、耶穌步行海面、嚟到佢哋處、好似想經過嘅一樣。

門生見佢喺海面行、估係怪物、就叫喊起嚟。

因為人人都見佢、故此咁慌、耶穌即時對佢哋講話、你哋放心囉、係我呀、唔使怕、

噉就佢上船、到佢哋處、風就息嘵、佢哋心中好慌。

因為佢哋心硬、唔嘵得擘餅嘅異蹟呀。○

已經過海、去到革尼撒勒地方、就灣泊岸邊、

佢哋離船上岸、眾人即時認得佢、

走勻四圍地方、聞得耶穌喺邊處、就𢬿床擡住病人去個處。

但凡耶穌所到嘅地方、或係村裏、或係城中、或係鄉間、人哋擡病人擠倒街上、求耶穌俾佢哋摩吓衫邊呮、凡係摩親佢嘅、個個都得好番。