加拉太書 4 · 粵讀聖經

管理員上載／人工修訂；未另行獨立校對。

1 我意思係，承受產業嘅人，只要仲係細路，雖然係全部產業嘅主人，同奴僕其實冇分別。 

2 佢仍然要受監護人同管家管理，直到佢阿爸定好嘅日子。 

3 我哋都一樣，仲係細路嗰陣，就畀世上嗰啲初步嘅宗教規條奴役。 

4 但係，等到時候成熟，上帝就差佢個仔嚟。佢由女人所生，生喺律法管轄之下， 

5 為要將受律法管轄嘅人贖出嚟，好等上帝收納我哋做佢嘅兒女。 

6 因為你哋係上帝嘅兒女，上帝就差佢個仔嘅靈嚟到我哋心裏面。呢位靈呼喊：「阿爸，爸爸呀！」 

7 所以，你已經唔再係奴僕，而係上帝嘅兒女；既然係兒女，你亦都靠住上帝，成為承受產業嘅人。



8 以前，你哋唔認識上帝，為嗰啲根本唔係神嘅嘢做奴僕。 

9 但係，而家你哋已經認識上帝；講得準啲，係上帝認識咗你哋。點解你哋又返轉頭，走返去嗰啲軟弱又貧乏嘅初步宗教規條嗰度，想重新由頭做佢哋嘅奴僕呢？ 

10 你哋好小心噉守住某啲日子、月份、節期同年份。 

11 我擔心你哋，怕我為你哋勞碌咗一場，到頭嚟都係白費。



12 你哋要好似我噉，因為我都好似你哋噉。弟兄姊妹，我求你哋！你哋冇做過任何對唔住我嘅事。 

13 你哋知道，我第一次傳福音畀你哋，係因為我身體軟弱。 

14 我身體嘅情況雖然考驗住你哋，你哋都冇睇我唔起，亦都冇厭棄我；反而好似接待上帝嘅天使、接待基督耶穌噉接待我。 

15 噉你哋當時覺得自己有福，嗰份心情而家去咗邊度呢？我可以為你哋作證：如果做得到，你哋連自己對眼都會挖出嚟畀我。 

16 噉我而家因為向你哋講真話，就變咗你哋嘅敵人咩？



17 嗰啲人好熱切噉拉攏你哋，但係唔懷好意；佢哋想將你哋隔開，好等你哋轉過嚟熱切追隨佢哋。 

18 不過，喺好事上受到人熱切關心，時時都係好嘅，唔單止係我同你哋一齊嗰陣。 

19 我親愛嘅仔女，我又好似生仔噉為你哋受陣痛，直到基督喺你哋裏面成形。 

20 我真係想而家就喺你哋身邊，轉一轉我講嘢嘅語氣，因為我對你哋嘅情況真係唔知點算。



21 你哋呢啲想受律法管轄嘅人，話我知：你哋冇聽律法講乜嘢咩？ 

22 因為聖經上寫住，亞伯拉罕有兩個仔，一個係女奴生嘅，一個係自由身嘅女人生嘅。 

23 不過，女奴嗰個仔係按肉身生嘅；自由身嗰個女人嘅仔，就係藉住應許生嘅。 

24 將呢啲事按寓意嚟解釋，呢兩個女人就代表兩個約。一個約出自西奈山，生出嚟嘅仔女都受奴役；呢個約就係夏甲。 

25 因為夏甲代表阿拉伯嘅西奈山，同而家嘅耶路撒冷相對應；因為耶路撒冷同佢嘅仔女都做緊奴僕。 

26 但係，天上嘅耶路撒冷係自由嘅，佢就係我哋嘅母親。



27 因為聖經上寫住：「你呢個生唔到仔女、冇生過仔女嘅女人，要歡喜！你呢個冇受過生產陣痛嘅女人，要放聲，大聲呼喊！因為嗰個孤單嘅女人，仔女比有丈夫嗰個仲多。」 

28 弟兄姊妹，你哋都好似以撒噉，係因為應許而生嘅仔女。 

29 不過，當時按肉身生嗰個逼迫按聖靈生嗰個，而家都一樣。 

30 但係，聖經講乜嘢呢？「將嗰個女奴同佢個仔趕出去！因為女奴個仔絕對唔會同自由身嗰個女人嘅仔一齊承受產業。」 

31 所以，弟兄姊妹，我哋唔係女奴嘅仔女，而係自由身嗰個女人嘅仔女。



授權：CC-BY-NC-SA-4.0