約翰福音 8章 — 粵讀聖經
更新：2026-10-08

1 耶穌就去咗橄欖山。

2 天一光，佢又返到聖殿。民眾都嚟到，佢就坐低教導佢哋。

3 經學家同法利賽人帶咗一個女人嚟見耶穌，佢係喺通姦嗰陣畀人捉到嘅。佢哋叫佢企喺中間，

4 試探耶穌，對佢話：「老師，呢個女人通姦嗰陣，當場畀人捉到。

5 摩西喺律法度吩咐我哋，呢種女人要用石頭掟死。噉你點講呢？」

6 佢哋噉講，係要試探耶穌，等自己有辦法控告佢。耶穌就彎低身，用手指喺地上寫，冇理會佢哋。

7 佢哋不停噉問，耶穌就直返身，對佢哋話：「你哋當中邊個冇罪，就由佢先用石頭掟呢個女人啦。」

8 跟住佢又彎低身，喺地上寫。

9 佢哋聽到，良心責備佢哋。於是佢哋由年紀大嘅開始，一個一個離開。剩返耶穌，仲有企喺中間嘅嗰個女人。

10 耶穌直返身，見到除咗個女人之外，冇其他人，就問佢：「控告你嗰啲人喺邊度呀？冇人定你罪咩？」

11 個女人話：「主，冇人。」耶穌話：「我亦都唔定你罪。你走啦，唔好再犯罪。」⟧

12 耶穌又對佢哋話：「我係世界嘅光。跟住我嘅人，絕對唔會喺黑暗入面行，反而會有生命嘅光。」

13 法利賽人就對佢話：「你係為自己作證，你嘅見證唔可信。」

14 耶穌回答佢哋：「就算我為自己作證，我嘅見證都可信，因為我知道自己由邊度嚟，要去邊度。但係我由邊度嚟，又要去邊度，你哋都唔知道。

15 你哋係按人嘅標準去判斷人，我就唔判斷任何人。

16 就算我作判斷，我嘅判斷都係真確嘅，因為唔係得我一個，仲有差我嚟嘅天父同我一齊。

17 你哋嘅律法亦都寫住，兩個人嘅見證係可信嘅。

18 我為自己作證，差我嚟嘅天父亦都為我作證。」

19 佢哋就問耶穌：「你父親喺邊度？」耶穌回答：「你哋唔認識我，亦都唔認識我天父。如果你哋認識我，就會連我天父都認識。」

20 呢啲說話，係耶穌喺聖殿教導人嗰陣，喺收奉獻嘅地方講嘅。冇人捉佢，因為佢嘅時候仲未到。

21 耶穌又對佢哋話：「我要走喇，你哋會搵我，亦都會喺自己嘅罪中死去。我去嘅地方，你哋嚟唔到。」

22 嗰啲猶太人就話：「佢話『我去嘅地方，你哋嚟唔到』，唔通佢會自殺？」

23 耶穌對佢哋話：「你哋係由下面嚟，我係由上面嚟；你哋屬於呢個世界，我唔屬於呢個世界。

24 所以我先話，你哋會喺自己啲罪中死去。因為如果你哋唔信我就係嗰位，你哋就會喺自己啲罪中死去。」

25 佢哋就問耶穌：「你係邊個？」耶穌對佢哋話：「我究竟點解要同你哋講嘢呢？

26 關於你哋，我有好多嘢要講，亦都有好多嘢要判斷。但係差我嚟嗰位係真實嘅，我將喺佢嗰度聽到嘅，講畀世人聽。」

27 佢哋唔明白，耶穌係同佢哋講緊天父。

28 所以耶穌話：「你哋將人子舉起嗰陣，就會知道我就係嗰位，亦都會知道我冇一樣嘢係憑自己去做嘅。我講呢啲嘢，係照住我天父教我嘅去講。

29 差我嚟嗰位同我一齊，佢冇留低我一個，因為我做嘅，一向都係佢喜悅嘅事。」

30 耶穌講呢啲說話嗰陣，有好多人信咗佢。

31 耶穌就對嗰啲已經信佢嘅猶太人話：「如果你哋一直持守我嘅話，你哋就真係我嘅門徒；

32 你哋會認識真理，真理會令你哋得到自由。」

33 佢哋回答耶穌：「我哋係亞伯拉罕嘅後代，從來冇做過任何人嘅奴隸。你點解會話，我哋會得到自由呢？」

34 耶穌回答佢哋：「我實實在在話畀你哋知，凡係犯罪嘅人，都係罪嘅奴隸。

35 做奴隸嘅，唔會永遠留喺屋企；做仔嘅，就會永遠留喺度。

36 所以，如果個仔釋放你哋，你哋就真係自由喇。

37 我知道你哋係亞伯拉罕嘅後代。但係你哋想殺我，因為你哋裏面容唔落我嘅話。

38 我講嘅，係我喺天父嗰度見過嘅事。所以你哋都要照住從天父聽到嘅去做。」

39 佢哋回答佢：「我哋嘅父親係亞伯拉罕。」耶穌對佢哋話：「如果你哋係亞伯拉罕嘅兒女，就會做亞伯拉罕做嘅事。

40 但係而家你哋想殺我。我係一個將從上帝嗰度聽到嘅真理，講畀你哋聽嘅人。亞伯拉罕冇做過呢種事。

41 你哋做嘅，係你哋父親做嘅事。」佢哋對耶穌話：「我哋唔係由淫亂生出嚟嘅！我哋只有一位父，就係上帝。」

42 耶穌對佢哋話：「如果上帝係你哋嘅父，你哋就會愛我，因為我係由上帝嗰度嚟，而家已經嚟到。我唔係自己決定嚟嘅，係佢差我嚟嘅。

43 你哋點解唔明我講緊乜呢？因為你哋聽唔入我嘅話。

44 你哋係由魔鬼而嚟，佢係你哋嘅父。你哋想做嘅，就係滿足你哋父親嘅慾望。佢由起初就係個殺人兇手，佢唔企喺真理嗰邊，因為佢裏面冇真理。佢一講大話，講嘅嘢就係出自佢自己，因為佢係個講大話嘅，亦都係大話嘅父。

45 但係我講真理，你哋就正因為噉唔信我。

46 你哋邊個可以證明我有罪？如果我講嘅係真理，你哋點解唔信我呢？

47 屬於上帝嘅人，會聽上帝嘅話。你哋唔聽，就係因為你哋唔屬於上帝。」

48 嗰啲猶太人回答佢：「我哋話你係撒瑪利亞人，又鬼上身，唔係講得啱咩？」

49 耶穌回答：「我冇鬼上身。我尊敬我天父，你哋反而侮辱我。

50 我唔尋求自己嘅榮耀；有一位為我尋求榮耀，亦都作判斷。

51 我實實在在話畀你哋知，如果有人遵守我嘅話，佢就永遠都唔會見到死亡。」

52 嗰啲猶太人對佢話：「而家我哋知道你鬼上身喇！亞伯拉罕死咗，先知都死咗，你仲話：『如果有人遵守我嘅話，佢就永遠都唔會嘗到死亡。』

53 唔通你比我哋嘅父親亞伯拉罕更偉大？佢都死咗，先知都死咗。你當自己係邊個？」

54 耶穌回答：「如果我自己畀自己榮耀，我嘅榮耀就乜都唔係。畀我榮耀嘅係我天父；你哋講到佢，就話：『佢係我哋嘅上帝。』

55 但係你哋唔認識佢，我就認識佢。如果我話自己唔認識佢，我就會同你哋一樣，係個講大話嘅人。但係我認識佢，亦都遵守佢嘅話。

56 你哋嘅父親亞伯拉罕，歡歡喜喜盼望見到我嘅日子。佢見到咗，就好開心。」

57 嗰啲猶太人就對佢話：「你都未夠五十歲，就見過亞伯拉罕？」

58 耶穌對佢哋話：「我實實在在話畀你哋知，亞伯拉罕仲未出世，我就一直存在。」

59 於是佢哋攞起石頭，要掟耶穌；耶穌就匿埋，離開咗聖殿。

粵讀聖經 · Can Read Bible
本站原創粵語譯文：CC BY-NC-SA 4.0
https://creativecommons.org/licenses/by-nc-sa/4.0/
引用時請附書卷章節、來源網址；有修改請註明。第三方內容保留原有授權。