民數記 28 · 粵讀聖經

管理員上載／人工修訂；未另行獨立校對。

1 上主对摩西讲：
2 「你要吩咐以色列人，同佢哋讲：『你哋要留心，按指定嘅时间向我献祭。献畀我嘅祭物係我嘅食物，要用火献上，发出令我喜悦嘅香气。』
3 你要同佢哋讲：『你哋要献嘅火祭係咁：每日向上主献两只一岁、冇残缺嘅公绵羊羔，作常献嘅燔祭。
4 一只喺朝早献，另一只喺黄昏献。
5 仲要用十分之一伊法幼面粉，拌埋四分之一欣捣出嚟嘅油，作谷物祭。
6 呢个係喺西奈山献过嘅常献燔祭，係献畀上主嘅火祭，发出令佢喜悦嘅香气。
7 每只羊羔要配四分之一欣嘅酒作奠祭。你要喺圣所向上主倒酒作奠祭，所用嘅係发酵嘅酒。
8 另一只羊羔要喺黄昏献，照朝早嘅谷物祭同奠祭咁样办，献火祭畀上主，发出令佢喜悦嘅香气。

9 安息日要献两只一岁、冇残缺嘅公绵羊羔，另外用十分之二伊法幼面粉拌油，作谷物祭，又要献上配合呢个祭嘅奠祭。
10 每逢安息日都要献呢个燔祭，係喺常献嘅燔祭同佢嘅奠祭以外，另外献上嘅。

11 每个月开始嗰日，你哋要向上主献两只年轻嘅公牛、一只公绵羊同七只一岁嘅公绵羊羔作燔祭；全部都唔可以有残缺。
12 每只公牛要配十分之三伊法幼面粉，拌油作谷物祭；每只公绵羊要配十分之二伊法幼面粉，拌油作谷物祭。
13 每只羊羔要配十分之一伊法幼面粉，拌油作谷物祭。呢啲燔祭係献畀上主嘅火祭，发出令佢喜悦嘅香气。
14 奠祭要用葡萄酒：每只公牛半欣，每只公绵羊三分之一欣，每只羊羔四分之一欣。呢个係每月要献嘅燔祭，一年里面每个月都要献。
15 仲要献一只公山羊，作赎罪祭畀上主；呢只公山羊係喺常献嘅燔祭同佢嘅奠祭以外，另外献上嘅。

16 第一个月十四日要向上主守逾越节。
17 同一个月十五日係节期，七日都要食无酵饼。
18 第一日要有圣会，任何劳动工作都唔可以做。

19 你哋要献火祭畀上主，用两只年轻嘅公牛、一只公绵羊同七只一岁嘅公绵羊羔作燔祭；全部都唔可以有残缺。
20 配合呢啲祭牲嘅谷物祭，要用幼面粉拌油；每只公牛用十分之三伊法，每只公绵羊用十分之二伊法。
21 嗰七只羊羔，每只都要配十分之一伊法。
22 仲要献一只公山羊作赎罪祭，为你哋赎罪。
23 呢啲祭物，都係喺朝早常献嘅燔祭以外，另外献上嘅。
24 七日里面，每日都要照样献祭，将食物献作火祭畀上主，发出令佢喜悦嘅香气；呢啲都係喺常献嘅燔祭同佢嘅奠祭以外，另外献上嘅。
25 第七日要有圣会，任何劳动工作都唔可以做。

26 喺初熟果子嗰日，即係你哋守七七节、向上主献新谷物祭嗰阵，要有圣会，任何劳动工作都唔可以做。
27 你哋要献两只年轻嘅公牛、一只公绵羊同七只一岁嘅公绵羊羔作燔祭，发出令上主喜悦嘅香气。
28 配合呢啲祭牲嘅谷物祭，要用幼面粉拌油；每只公牛用十分之三伊法，每只公绵羊用十分之二伊法。
29 嗰七只羊羔，每只都要配十分之一伊法。
30 仲要献一只公山羊，为你哋赎罪。
31 除咗常献嘅燔祭同佢嘅谷物祭，你哋仲要献上呢啲祭物，同埋各份奠祭。所用嘅牲畜都唔可以有残缺。』」

授權：CC-BY-NC-SA-4.0