出埃及记 12 · 1888《出埃及记》（粤语联合译本，香港理工大学数据）

耶和华喺埃及地对摩西亚伦话。

呢个月必做你哋嘅正月、即係做你嘅年头。

你要对以色列会众话、呢个月初十日、各家长要为各家预备一只羊仔。

若係个家人少、不能用嘥一只、就共隔离嘅邻舍同预备、照人嘅数目及食量嚟计羊仔。

你嘅羊仔必要冇瑕疵嘅羊公、未曾满一年嘅、或要喺绵羊之中、或喺山羊之中揀择、

你要留到本月十四日、等到挨晚、以色列会嘅众人就㓥羊仔。

都要拧个的血、搽在食羊仔个间屋嘅左右门枋、与及门楣。

个晚要食羊仔嘅肉、用火烧熟、共无酵饼苦茶同食。

生嘅、水煮嘅、都唔好食、必要连头连髀及五脏、烧熟嚟食。

咪将剩下嘅留到明日、若有留到明日、必要用火焚烧。

你哋要噉样食、腰间绑带、脚上著鞋、手揸拐杖、又要急速食、个日就係耶和华嘅逾越节。

因为个晚我必喺埃及地周围行、打死埃及嘅长子、及第一胎嘅畜牲、亦审问埃及嘅众神、我係耶和华呀。

个的血在你所住嘅屋、为你哋做记号、我一见个的血、就逾越你哋去、我击埃及地之时、灾祸唔到你身上灭你。

你哋当要记念呢个日子定为节期、在耶和华面前谨守、世世代代守呢个节、永远做定例。

七日之内、你哋要食无酵饼、头一日、各家要除清有酵之物、因为头一日至到第七日、凡食有酵饼嘅、必在以色列中被灭绝。

头一日、你哋应当有圣会、到第七日亦应有圣会、呢两日、除哓预备各人所食之外、唔俾做工夫、独係预备食物呮。

你哋当要守无酵节期、因为个日我带你哋大众出埃及地、故此你要世世代代谨守此日、永远做定例。

从正月十四日个晚、至到二十一日个晚、你哋要食无酵饼。

七日之内、你哋各家唔好有酵、唔论做人客嘅、或本土人、凡食有酵之物嘅、必在以色列会中被灭绝。

有酵之物、你哋总唔好食、唔论住在边处、必要食无酵饼。

摩西招以色列众长老嚟、对佢哋话、你哋每家要揀择一只羊仔、㓥哓、做逾越节嘅羊仔。

都要𢬿一把牛膝草、挤落盘内嘅血浸湿、将血搽在门楣、与及左右嘅明枋、咪俾一个人出门口、等到天光。

因为耶和华必周围行、打死埃及人、见有血在门楣、及左右门枋、耶和华必越过个度门、唔容行剿灭入你屋打死你。

你哋必要遵守此事、为你共子孙永远做定例。

你哋已经到哓耶和华照所应许就赐过你嘅地方、必要守此礼。

将来你哋子孙若问你、因乜事行呢样礼。

你哋要答话、呢的係耶和华逾越节嘅祭、因耶和华打死埃及人之时、喺埃及地越过以色列人嘅屋、拯救我哋各家呀、百姓就恶低头叩拜。

以色列人退出、遵依耶和华所吩咐摩西亚伦嘅嚟做。

到哓半夜、耶和华打死凡埃及嘅长子、从坐王位嘅法老之长子、至到监中犯人嘅长子、与及第一胎嘅畜牲。

夜间法老共众仆及埃及众民都起身、埃及有好大喊声、因为冇一家冇死人嘅。

夜间法老就召摩西亚伦话、起身出去、离开我嘅百姓之中、你共以色列人去服事耶和华、照你所讲。

亦带牛群羊群同去、照你所讲、但都愿你祝福我。

埃及众人催逼以色列人急速出埃及、话、我哋众人哙死咯。

百姓就拧无酵嘅生面、搓面嘅盘、已经共衣服包埋挤在膊上。

以色列人遵依摩西所讲嚟做、向埃及人攞金银嘅器皿、与及衣服。

耶和华令百姓喺埃及人面前得恩、埃及人都俾过佢哋、噉就夺哓埃及人嘅嘢咯。

以色列人从兰塞去到数割、除哓细蚊仔之外、步行嘅壮年人、大约有六十万。

有好多闲杂人同佢哋上去、亦有牛群羊群极多。

众人将从埃及带出嚟嘅无酵生面、炕成无酵饼、因以色列人被赶逐出埃及、不能迟慢、又未曾预备干粮呀。

以色列人喺埃及寄居、共四百三十年。

过哓四百三十年、当个日、耶和华嘅众军由埃及地出嚟。

个晚、因带佢哋出埃及地、故此要为耶和华谨守、称为耶和华之夜、凡以色列子孙、都要世世代代谨守个晚。

耶和华对摩西亚伦话、逾越节嘅事例係噉、人客不可食。

但用银所买嘅奴隶、你已经同佢行割礼嘅、个人就可以食。

人客及雇工嘅人、都不可食。

必要喺一间屋里嚟食、咪拧的多肉出去屋外、亦咪整断一条骨。

以色列会众人、俱要守此节。

若有人客在你哋处寄居嘅、想为耶和华守逾越节、佢所有嘅男人、必要受割礼、然后可以同守、就好似本土人一样、但未曾受割礼嘅、必不可食。

本土人与及人客在你哋处寄居嘅、都要同此例。

以色列人遵依耶和华所吩咐摩西亚伦嘅、都噉样做。

当个日、耶和华将以色列人、依住军旅、带佢哋出哓埃及地。