此后，犹太人有一个节，耶稣上耶路撒冷。
耶路撒冷近住羊门有一个池，希伯来土音叫做毕士大，有五个廊头。
其中瞓倒好多病人，係盲嘅、跛嘅、血枯嘅，等水喐动。
因为天使有时落池搅喐的水，水喐之后第一个落池嘅，唔论有乜野病，就得好番。
喺个处有一个人，病哓三十八年。
耶稣见佢瞓处，知到佢病哓好耐，就对佢话：「你想好番唔呢？」
个病人答佢话：「主呀，当水喐之时，我冇人扶我落池；及至我嚟之时，别人先过我落去咯。」
耶稣对佢话：「起身，拧你床铺行喇！」
个人立刻好番，拧起佢床铺就行。个日係安息日。
所以犹太人对个好番嘅人话：「今日係安息日，你拧床铺係唔著呀。」
答佢哋话：「令我好番嘅对我话：『拧你床铺行。』」
佢哋问佢话：「叫你拧床铺行嘅，係乜人呢？」
得好番嘅唔知係乜谁，因为喺个处人多，耶稣就避哓。
此后，耶稣喺殿遇著个个人，就对佢话：「你已经好番，咪再犯罪，免至受难更关係呀。」
个人去话过犹太人知：「令佢好番嘅係耶稣呀。」
故此犹太人迫害耶稣，因佢当安息日做呢的事。
耶稣答佢哋话：「我父做事至到如今，我亦做呀。」
因噉样，犹太人越发想杀佢，因佢唔止犯安息日，兼且话上帝係佢父，以为自己共上帝係平等。
耶稣就答佢哋话：「我实实话你知，倘若子未见过父所做嘅，自己就一件唔做得；因为父所做嘅事，子亦照样做。
父爱个子，就𢬿自己所有做嘅嚟指示佢，而且要𢬿大过呢的事嘅指示佢，令你哋见出奇。
因为好似父起死者令佢复生，子亦噉样随自己嘅意嚟令人复生。
因为父唔审判人，係𢬿审判交嘥过子，
令众人敬子，好似敬父；唔敬个子嘅，即係唔敬差遣佢嘅父。
我实实话你哋知，听我说话兼信差遣我嘅，有永生，又唔至定罪，係已经出死入生呀。
我实实话你哋知，时候将到，如今係咯，死者必定闻上帝子嘅声，个的闻嘅必定生。
因为好似个父在自己有生命，佢赐过子亦係噉样在自己有生命，
而且赐权过佢嚟审判，因佢係人子呀。
咪以为呢的係出奇，因为时候将到，但凡在坟墓嘅必闻得佢声，
就出嚟；个的行善嘅复活得永生，个的行恶嘅复活得定罪。
我自己不能擅自做一件事，我照依所闻嘅嚟审判；我审判係公道，因为我唔係依住自己旨意嚟做，係依住差遣我者嘅旨意呀。
我若为自己做证，我嘅证唔係真。
有别个为我做证嘅，我知到佢为我所证嘅係真呀。
你也曾打发人去约翰处，佢为真嘅嚟做证。
其实我唔使人做证，但我讲呢的，係令你哋得救呀。
约翰係做点著而且光明嘅灯，你哋暂时欢喜佢光。
但我有大过约翰嘅证据，因为父赐我成就嘅工夫，即係我所做嘅工夫，呢的就证明我係父所差遣嘅哩。
而且父，即差遣我者，亦为我做证；你哋从来未闻佢声音，未见佢形状。
你冇佢嘅道存在你心里，因为佢所差遣嘅，你唔信佢。
你要考究圣书，因为你以为其中有永生；个的书就係为我做证嘅呀。
但你哋唔肯亲就我嚟得生命。
我唔求人嘅荣耀呀。
但我知到你哋胸中冇爱上帝嘅心。
我托我父嘅名嚟到，你唔招接我；别人若托自己名嚟到，你就招接佢。
你哋彼此受荣耀，唔求由独一位上帝嚟嘅荣耀，点能信得呢？
咪估我喺父处告讼你哋；有一个告讼你嘅，即係你所倚恃嘅摩西呀。
若係你也曾信摩西，亦必定信我，因为佢所写落嘅係指我。
若係你唔信佢嘅书，点信我嘅说话呢？」