约翰福音 9 · 1883《约翰福音传》（粤语联合译本修订本，香港理工大学数据）

耶稣行过个时、见一个人出世係盲嘅、

门生问佢话、夫子、呢个人出世就盲嘅、係乜谁犯罪呢、係佢自己吖、抑或佢父母呢、

耶稣答话、呢个人唔係犯罪、佢父母亦唔係、但係令上帝嘅工夫在佢处显明呮、

重有热头之时、我哋要做打发我嚟嘅工夫、夜晚将到、就冇人能做工夫咯、

我喺世上之时、就係世上嘅光、

讲完呢的、就吐口水落地、俾口水抠匀的泥、𢬿泥嚟搽个盲人嘅眼、

对佢话、去西罗亚池处洗吓、西罗亚繙译即係受打发、佢去洗、番嚟就睇得见咯、

佢嘅邻舍、共平素见佢係乞食嘅、话、呢个唔係坐处乞食嘅咩、

有的话、係佢呀、有的话、好似佢、但佢自己话、我係咯、

众人就对佢话、你眼点样得开呢、

佢答话、个人名叫耶稣嘅、抠匀的泥搽我眼、对我话、去西罗亚池洗吓、我去洗、就睇得见、

众人对佢话、个人喺边处呢、佢话、我唔知、

众人带住平素係盲眼嘅、去法利赛人处、

当耶稣抠匀的泥开佢眼个日、係安息日、

法利赛人又问佢点样睇得见、佢答话、佢挤的泥落我眼、我洗过、就睇得见、

法利赛人之中有的就话、呢个人唔係由上帝嚟嘅、因佢唔守安息日呀、有的话、罪人点能做噉样嘅异迹呢、噉就争论、

众人再对个盲嘅话、佢已经开你眼、你话佢係乜野人呢、答话、佢係先知、

但犹太人唔信佢平素係盲眼、后来得见嘅、等到叫得见者嘅父母嚟、

问佢哋话、呢个係你嘅仔、即係你所讲出世就盲嘅唔係呢、如今佢点样得见呢、

佢父母答话、呢个係我嘅仔、又出世係盲嘅、係我所知、

但如今点样得见、我就唔知、乜谁开佢眼、我亦唔知、佢年纪已经大咯、你问佢、佢哙为自己讲、

佢父母噉样话、係怕犹太人呀、因为犹太人已经议定若有人认耶稣係基督、必赶佢出会堂、

故此佢父母话、佢年纪已经大咯、你问佢啰、

所以众人再叫个盲嘅嚟对佢话、你要归荣上帝、我哋知呢个係罪人、

佢答话、係罪人唔係、我唔知、但有一件事、我知到、即係我昔日盲如今、睇得见、

众人就对佢话、佢共你做乜野、点样开你眼呢、

佢答话、我也曾话你知、你唔听、做乜又想再听呢、你哋都想做佢门生咩、

众人閙佢话、你係佢门生、我哋係摩西嘅门生、

上帝共摩西讲、我哋知到咯、但係呢个人、我哋唔知佢从边处嚟嘅、

个人答佢哋话、佢已经开我眼、你都唔知佢从边处嚟、呢的事真係出奇咯、

我知到上帝唔听从罪人、独係敬佢能遵依佢旨意嘅、上帝致听从佢、

自从开辟世界以来、出世係盲嘅、未听过有人开得佢嘅眼、

呢个人倘若唔係由上帝嚟、就唔做得乜事、

众人答佢话、你全喺罪中出世、反转教我哋咩、就赶佢出去、

耶稣闻得众人赶佢出去、搵著佢、就话、你信上帝之子唔信呢、

佢答话、主呀、边个、等我可以信佢呢、

耶稣对佢话、你也曾见佢、而且共你讲紧嘅、就係佢咯、

佢话、主呀、我信咯、于是拜耶稣、

耶稣话、我为审判降临呢个世界、令唔见嘅得见、见嘅反做盲、

同耶稣喺处嘅法利赛人、闻得呢的说话、就话、我哋都係盲嘅咩、

耶稣对佢哋话、你哋若係盲、就冇罪、但如今你哋话睇得见、故此你嘅罪重喺处呀、