路加福音 1 · 1872《路加福音传》（香港教育大学数据）

有好多人，将我地教中大有凭据嘅事，一段写落。即係自始亲眼睇见，做传道嘅人，嚟传授过我地嘅。

我从起头子细查明各事，故此以为至好係依住次序写出嚟，通知提阿非罗仁台。

想你深知所学过嘅道理，係确实嘅。

当希律做犹太王个阵时，有亚比亚班嘅祭司，名叫撒加利亚，佢嘅妻係亚伦后裔，名叫以利沙伯。

佢两个人，在上帝前，係公义嘅，照依主嘅律法礼仪嚟行，冇的差错。

但佢冇仔，因为以利沙伯唔成得孕嘅，佢两个人，年纪又老。

个时撒加利亚在上帝之前，照佢班次，轮到做祭司嘅职。

依祭司例，佢执筹得倒入主殿烧香。

烧香个时，大众百姓，喺外出祈祷。

主嘅使者显现出嚟，企倒香台右边。

撒加利亚睇见佢，就吓得好慌。

天使对佢话，撒加利亚唔使慌，你所祈求嘅，已经听闻咯，你妻以利沙伯，将要生子过你，你攺佢嘅名做约翰。

你将欢喜快乐，众人亦欢喜佢生。

因为在主之前，佢将来为大，淡酒浓酒都唔饮，自从母胎个时，就得圣神充满嘅咯。

佢必令好多以色列人归主，即係佢嘅上帝。

佢将来在主前先行，使以利亚情性才能，令做父亲嘅，将心归向子女，令忤逆嘅人，归向义人嘅智慧，为主预备做新嘅百姓。

撒加利亚对天使话，点知到必有呢件事呢，因为我已经老咯，我妻又年老咯。

天使答佢话，我係加伯列，企倒上帝面前，受打发嚟，报呢个好消息过你知。

但係你是必要哑，唔哙讲，至到呢件事成就个日，因为你唔信我嘅说话，时候一到，必定应验嘅。

百姓等候撒加利亚，见佢喺殿里头咁耐，就见出奇。

临到佢出嚟，唔哙同佢地讲，就知到喺殿里头，必定有事睇见，因为佢使头嚟会意呮，竟然哑哓咯。

及至佢职事嘅日期完满，就番去归。

后来佢嘅妻以利沙伯怀孕，静中住埋五个月。

就话，主照顾我个时，噉样待我，俾我在人间得除羞耻。

到第六个月，天使加伯列奉上帝命，去到加利利嘅城，名叫拿撒勒。

去见一个女子，名叫马利亚，即係大辟后裔，约瑟所聘定嘅。

天使入去对佢话，受恩嘅女平安呀，上主保佑你，在众女之中，你得福咯。

马利亚睇见，就惊奇佢嘅说话，想吓噉样问安，係点解呢。

天使对佢话，马利亚，你唔使慌，你得上帝嘅恩典咯。

你将怀胎生子，攺佢嘅名做耶稣。

佢将做大，称为至上者之子，主上帝𢬿佢祖宗大辟嘅位俾过佢。

永远做雅各一家嘅王，佢嘅国冇穷尽。

马利亚对天使话，我未嫁人，点得呢件事呢。

天使答佢话，圣神将降临你，至上者嘅力将庇荫你，所以生出个圣嘅，称为上帝之子。

而且你嘅亲戚以利沙伯年老，平日话佢唔成得孕嘅，今时䭾倒男仔，已经六个月咯。

因为上帝冇一样事不能做得。

马利亚话，我係上主嘅婢，情愿照你嘅说话，应验在我，天使就离开佢去哓。

个阵时，马利亚起程，赶快去山嘅地方，去到犹太省一个城。

入撒加利亚嘅屋，问以利沙伯安。

以利沙伯一听见马利亚问安，佢怀嘅胎，就在肚里跳起嚟，以利沙伯被圣神充满。

大声叫话，众女之中，你得福咯，你怀嘅胎，又得福咯。

我主嘅母亲到我呢处，我因何得噉呢。

因为你问安嘅声，一入我耳，喺我肚里嘅胎，欢喜到跳起嚟。

你既然信得，就有福咯，因为主对你讲嘅，是必应验呀。

马利亚话，我嘅心，独尊主为大。

我嘅心神，欢喜救我嘅上帝。

因为佢照顾佢婢嘅卑贱，从今以后，万世嘅人，都话我有福咯。

因为权能之主，为我做成咁大嘅事，佢嘅名係圣。

佢怜恤敬畏佢嘅人，至到世世。

主𢬿佢手臂嘅力，散清心志骄傲嘅人。

有权嘅人，赶佢离位，卑贱嘅人，提拔起佢。

肚饿嘅人，俾好野佢食饱，富贵嘅人，令佢空手番去。

扶持佢嘅臣子以色列。

永远记念矜恤亚伯拉罕，同佢嘅子孙，照依先头同我祖宗所讲嘅。

马利亚共以利沙伯住三个月，就番去归。

以利沙伯生产之期已到，就生个仔。

隣里亲戚，听见上主咁怜恤佢，大家都同埋佢欢喜。

过八日，大家都嚟共佢嘅仔行割礼，想依番佢父亲嘅名，攺佢做撒加利亚。

但係佢母亲话，唔好，是必叫佢嘅名做约翰。

众人话，你亲戚之中，冇人叫呢个名嘅。

就使头嚟会意，问佢父亲，想攺做乜名。

佢父亲请攞一块粉牌写话，佢名係约翰，众人就见出奇。

佢嘅口即开，佢条脷亦解，讲说话嚟称赞上帝。

隣里个个惊慌，通犹太嘅山，都传扬呢件事。

听闻嘅人，挤倒心嚟话，唔知呢个仔，将来点样呀，上主嘅手，都扶持佢咯。

佢父亲撒加利亚，得圣神充满，嚟讲预言话。

应该称赞嘅係主，以色列嘅上帝，因为照顾佢嘅百姓，兼赎佢嘅罪。

为我地举起拯救嘅角，在佢臣子大辟嘅家。

照依佢托自古圣先知之口所讲嘅。

即係救我脱出仇敌，共凡憎恶我者嘅手。

怜恤我嘅祖宗，记念佢嘅圣约。

即係共我祖公亚伯拉罕所发嘅誓。

话将来救我脱出仇敌嘅手，总唔使怕。

一生在上主之前，将敬虔公义嚟服事佢。

小子呀，你将来叫做至上者嘅先知，因为将来係主嘅先头行，预备佢嘅路。

教佢嘅百姓，知到得救，就係在佢嘅罪得赦。

倚赖我上帝怜恤嘅心，俾清早嘅日光，由天上照临我。

照住个的在黑暗及死地阴翳嘅人，引我地脚，行在平安嘅路。

个小子渐渐长大，精神壮健，住在旷野，至到显过以色列人见个日。