路加福音 10 · 1867《路加传福音书》（香港教育大学数据）

后嚟，主又立七十人，日对对打发佢，先去佢想去嘅，各城，各地方。

对佢话：要收嘅榖係多，但做工夫嘅人係少；所以应该求田主打发人去收呀。

去喇！我打发你，好似羊仔入到柴狼嘅群。

唔好带荷包，共袋，共鞋，路上唔使共人行礼。

入人地屋企，就先话：你家有平安咯！

倘若有平安嘅仔喺个处就你嘅平安俾过佢；若冇，就你嘅平安归番你。

你喺个处住，佢俾你嘅，就饮，就食；因为做工夫嘅人得工钱係应该𡃉；唔好喺呢间屋搬去嗰间屋。

所入嘅城，有人接你，就食佢摆设嘅。

喺嗰处有有病嘅，就医好佢，兼之对众人话： 上帝嘅国曾嚟近你嚹。

入城，人唔接你，就出去街，

话：连你城嘅尘，黏倒我地嘅，而家对住你拍甩佢；虽然，你亦应该知道，上帝嘅国已经嚟近你嚹。

我话你知，到嗰日，所多玛嘅刑罚，比较嗰个城重容易受呀。

哥拉汛，有祸咯！伯赛大，有祸咯！因为喺你中间行嘅神迹，若喺推罗，西顿嚟行，就早已着麻衫，坐倒灰处，悔罪改过咯。

但到审判个日，推罗，西顿嘅刑罚，比较你，重容易受呀。

迦伯农，你已经升高到天，将近又推落阴间。

听从你嘅，即係听从我；睇轻你嘅，即係睇轻我；睇轻我嘅，即係睇轻打发我嘅嚹。

七十人欢欢喜喜番嚟，话：主，因为你嘅名，鬼都顺服我呀。

耶稣对佢话：我睇见撒但喺天跌落嚟，好似闪电噉样。

我𢬿能干赐俾你，可以踩得蛇共毒虫，制服仇敌各样嘅权势，必定冇损害你嘅咯。

但唔使因为个鬼(顺)服你，就见欢喜，乃因为你嘅名写落喺天，见欢喜呮。

个阵时，耶稣心神欢喜，话：父亲，天地嘅主阿，我称赞你，因为𢬿个的道理，对个的智慧嘅，巧捷嘅，就隐藏；对个的细蚊仔就显明；实在天父善嘅旨意係噉样咯。

万物都係天父赐俾我，除父之外，冇人识仔，除仔共仔欢喜指示嘅之外，又冇人识父。

耶稣睇吓佢嘅学生，静静对佢话：睇见你所睇见嘅，个的眼有福咯。

我话你知，因为好多先知师共君王都想睇见你地所睇嘅，又唔睇得见；想听你地所听嘅，又唔听得见。

有教律法嘅先生起嚟试耶稣话：先生，我应该点样做，致可以得永生呢？

耶稣对佢话：律法写嘅係点样呢？你读嘅点样呢？

答话：应该尽心，尽性，尽力，尽意，爱主你嘅上帝；又爱邻舍如同自己。

耶稣对佢话：你所答嘅係着；噉样做，就得生咯。

嗰个人想称自己为善义，故此对耶稣话：边个係我邻舍呢？

耶稣就答话：有人喺耶路撒冷去耶利哥，遇著贼；剥佢嘅衫，打伤佢，去哓，由得佢喺处半死。

啱啱有个祭司喺个条路嚟；睇见佢，就过哓去，

又有个利未人嚟到个处，行前去睇下佢，又去哓。

但有个撒马利亚人，行路个时，嚟到嗰处地方，一睇见，就起怜悯嘅心。

行近佢，𢬿油𢬿酒斟落伤口个处，包好：𢬿自己骑个只畜生，俾佢骑，带到歇店嚟照顾佢。

第二日，将近行身，拧出二钱银嚟，交俾店主，话：你且照顾佢；若係使多的，等我番嚟，个时俾番你。

个三个人中间，你估边个係嗰个遇著贼嘅邻舍呢？

话：可怜佢嘅，就係哩；耶稣对佢话：你去照噉样行喇。

正行路个时，耶稣入一条村乡，个处有一个女人，名叫马大，迎接耶稣入佢屋企。

佢有个姊妹，名叫马利亚，坐倒耶稣脚下，听佢讲。

马大供应嘅事多，心中忙乱，就行近对耶稣话：我嘅姊妹由得我一个人办理供应嘅事，主，你唔理唎咩，吩咐佢帮助我好呀。

但耶稣答佢话：马大阿！马大阿！你心思忙乱，因为事干十分多；

但紧要嘅係一件呮。马利亚已经揀倒好嘅份(祉？)，就唔抢得佢嘅咯。