路加福音 18 · 1872《路加福音传》（香港教育大学数据）

耶稣又对佢地讲譬喻，係指示人当时时祈祷，唔好癐。

就话，喺一个城，有一个审事官，佢唔怕上帝，又冇礼貌待人嘅。

喺嗰个城，有一个寡妇，入去见佢话，有人共我做仇敌，求你伸我嘅寃喇。

个官好耐都唔肯，后来自己心里话，虽然我唔怕上帝，又冇礼貌待人。

但因为呢个寡妇搅扰我，我要替佢伸寃，免致佢时常嚟嘈吵我咯。

主话，你地听个不义嘅官，所讲嘅说话。

就上帝所揀择嘅人，日夜祈祷，虽然忍耐好久，岂有到底唔共佢伸寃嘅咩。

我话你地知，上帝好快共佢地伸寃嘅，虽然係噉样，人子嚟到，岂见有信佢嘅人在世上咩。

有的人恃自己係公义，就睇轻别人嘅，所以耶稣设呢的譬喻，对佢地话。

有两个人，上殿堂祈祷，一个係𠵽唎㘔人，一个係收税嘅人。

个个𠵽唎㘔人，另自企倒处祈祷话，上帝呀，我感谢你，因为我唔似别人抢夺嘅，不义嘅，行淫嘅，又唔似呢个收税嘅。

我每七日之期，两回禁食，𢬿所入嘅，嚟十分纳一呀。

个收税嘅，远远企倒处，唔噉担高头嚟望天，就自己泵胸话，上帝呀，可怜我有罪嘅人。

我话你地知，呢个人去归，比较个𠵽唎㘔人，越发得称为义呀，因为自高嘅，必降为卑，自卑嘅，必得升高呀。

有人带个的嫩仔嚟耶稣处，等佢摩吓，门生睇见，就责成佢地。

但耶稣叫个的嫩仔嚟话，由得嫩仔嚟我处，唔好禁止佢，因为在上帝国嘅，正係噉样嘅人呀。

我实在话你地知，但凡承受上帝国嘅人，唔似细蚊仔噉样，必唔入得个国。

有一个官，嚟问耶稣话，良善嘅先生呀我要做乜野，致得永生呢。

耶稣对佢话，你为乜称我良善呢，除上帝之外，冇一个係良善𡃉。

各条诫命，你都晓得哩，即係唔好行淫，唔好杀人，唔好偷野，唔好做假见证，要孝敬你嘅父母。

佢话，呢各条诫，我自小都守住咯。

耶稣听闻呢的，就对佢话，你重少一件，你𢬿所有嘅野卖哓，嚟救济穷人，就是必有财帛喺天咯，又嚟跟随我喇。

个人听见，就好忧愁，因为佢係财主𡃉。

耶稣见佢咁忧愁就话，财主人入上帝嘅国，係好难咯。

骆驼穿过针眼，比较财主人入上帝嘅国，更容易呀。

听闻嘅人话，噉就边一个能得救呢。

耶稣话，在人所不能做得嘅，在上帝就做得呀。

彼得话，我地已经舍哓所有嘅野，嚟跟随你咯。

耶稣对佢地话，我实在话你地知，有人因为上帝嘅国，离哓屋宇，或父母，或兄弟，或妻儿嘅。

喺今世唔得倒好多倍，喺来世唔得倒永生，总有噉嘅呀。

耶稣带埋十二个门生对佢地话，我地上耶路撒冷，在先知所写，论及人子嘅，样样都必得应验嚹。

因为佢俾人地解佢过异邦人，就受戏弄凌辱，及口水唾佢。

𢬿鞭嚟打佢，又杀佢，到第三日，佢就番生咯。

呢的事，佢嘅门生唔晓得，而且呢的说话，係秘密嘅，佢地就唔识佢讲乜野。

耶稣行近耶利哥个时，有一个盲眼嘅人，坐倒路边乞食。

佢听闻大众行过，就问吓係乜野事。

有人对佢话，拿撒勒人耶稣经过呀。

佢就大声喓话，大辟嘅子孙耶稣，可怜我呀。

前头行嘅人，就责成佢，叫佢咪出声，但佢越发大声话，大辟嘅子孙，可怜我呀。

耶稣就歇住脚，吩咐人带佢嚟，嚟到近，就问佢话，你想我替你做乜野呢。

佢话，主，我想睇得见呀。

耶稣对佢话，睇得见咯，你嘅信医好你咯。

佢即时睇得见，跟随耶稣，称赞上帝，众百姓见呢件事，亦称赞上帝。