当时，该撒亚古士督有旨降下，吩咐天下嘅人注落户口册。
居里扭做叙利亚总督个时，呢的注册嘅事始初颁行。
众人去注册，各归自己嘅城。
约瑟都离哓加利利嘅拿撒勒，上到犹太省大辟城，名叫伯利恒，因佢係大辟家嘅子孙，
就同埋所聘定嘅妻马利亚一齐注册，个阵时马利亚已经怀胎咯。
佢哋住在个处之时，马利亚生产嘅期已到，
就生个长子，使块布包住，挤落马槽处，因为佢哋在客店冇地方。
喺个处野外，有看羊嘅人，夜晚轮流看守羊群。
主嘅使者临近佢哋，主嘅荣光周围照住佢哋，佢就十分惊慌。
天使对佢哋话：「唔使慌，我报个大欢喜嘅好消息过你知，关大众百姓𡃉。
因为今日喺大辟嘅城，为你哋生个救世者，即係主基督。
你将揾着一个嫩仔，俾布包住，瞓倒马槽处，个的就係记号咯。」
忽然间，有大队天军同埋个天使赞美上帝，话：
「在天上，荣光归番上帝；在地下和平，人得恩泽。」
个的天使离开佢哋升天，看羊嘅人相讲话：「我哋去到百利恒睇吓呢的事，即係主令我哋知嘅。」
就快的去到，揾着马利亚共约瑟，又见个嫩仔瞓倒马槽处。
已经见过，就将天使讲佢知个嫩仔嘅事远近传开。
凡听闻看羊人所讲嘅，个个都见出奇。
马利亚挤埋呢的说话喺心嚟想吓。
看羊嘅人因为所见所闻都照依天使所讲嘅，就归荣赞美神，番去归。
到第八日，为个嫩仔行割礼，改佢名做耶稣，即係唔曾怀胎个时天使所改落嘅。
佢哋嘅洁净日期已经满，照依摩西律法，就抱个嫩仔上耶路撒冷，献佢过主，
依主嘅律法所载话：「凡初胎嘅男仔，要归主叫做圣物。」
又依主嘅律法所讲，𢬿两只斑鸠或两只白鸽仔嚟献祭。
在耶路撒冷，有个人名叫西面，佢係公义敬虔嘅，平日仰慕个个安慰以色列百姓嘅；圣灵嚟感动佢。
佢曾得圣灵默示话，未死之时，必定睇见主嘅基督。
个阵时佢被圣灵感动，入到殿堂；适值耶稣父母抱嫩仔入嚟，想照律法去做，
西面抱起个嫩仔，赞美上帝，话：
「主呀，如今可以照依你讲，释放你个仆安安乐乐过世咯。
因为我亲眼得见你所立嘅救主，
即係你在万民之前所预备嘅；
佢係做光嚟照异邦人，亦做你以色列民嘅荣耀。」
耶稣嘅父母听见佢所讲及耶稣嘅，以为出奇。
西面祝福佢哋，对佢母亲马利亚话：「呢个嫩仔被主设立，令以色列好多人或兴起或衰败，做讥笑嘅话柄，
致令多人嘅意念露出嚟；又有把剑㓤穿你自己嘅心。」
又有个女先知，叫做亚拿，係亚设支派法内力嘅女，年纪老大；少年出嫁，同丈夫住哓七年，
佢做寡妇已经八十四年，都唔离开殿堂，禁食祈祷，日夜服事上帝。
个阵时，就行前嚟赞美上帝，又将呢个嫩仔嘅事，讲过凡在耶路撒冷想望得救嘅人听。
约瑟、马利亚遵主律法做完各样事，就去归加利利拿撒勒自己嘅村乡。
个嫩仔渐渐长大壮健，智慧充满，上帝嘅恩典照顾佢。
年年逾越节，佢父母去耶路撒冷。
耶稣十二岁个时，佢哋都遵节期嘅例上去。
节期满哓，大众番去归，个嫩仔耶稣重喺耶路撒冷，佢父母都唔知到。
估佢必喺同行嘅人之中，已经行哓一日路，就喺亲戚相识之中查问。
唔遇得着，就番去耶路撒冷揾佢。
三日后，遇着佢喺殿堂里头，坐倒先生中间，一面听，一面问。
听闻嘅人都惊奇佢咁聪明，又咁哙对答。
约瑟共马利亚睇见佢，就见出奇；佢母亲对佢话：「仔呀，做乜噉样待我哋呢？你父亲共我伤心嚟揾你呀！」
耶稣对佢哋话：「使乜揾我呢？岂唔知我应该喺我父亲嘅屋处咩？」
佢哋唔明佢所讲嘅说话。
耶稣同埋佢哋番落拿撒勒，顺从父母；佢母亲𢬿佢嘅说话挤嘥落心处。
耶稣年纪越大，越发智慧，又越发得上帝共人欢喜佢。