路加福音 20 · 1872《路加福音传》（香港教育大学数据）

有一日，耶稣在殿堂教紧百姓，传讲福音之时，个的祭司长共读书人，及长老，嚟问耶稣话。

请你话我地知，你𢬿乜野权柄嚟做呢的事，又乜谁赐呢的权柄过你呢。

耶稣答佢地话，我亦问你地一句，请你话我知。

约翰嘅洗礼，係由天嚟，抑或由人嚟嘅呢。

个的人私吓斟酌话，若话係由天嚟嘅，佢必定问，做乜你地唔信佢呢。

若话係由人嚟嘅，众百姓必𢬿石头嚟打我地，因为佢地都信约翰係先知呀。

就答耶稣话，我地唔知由边处嚟呀。

耶稣对佢地话，我都唔话你知，我𢬿乜野权柄嚟做呢的事。

就对百姓讲呢的譬喻话，有个人种哓一个菩提园，租过耕种嘅人，自己去哓别处地方好耐。

到期，打发一个仆，去个的耕种嘅人处，等佢地纳园中嘅果俾佢，但耕种嘅人打佢，令佢空手番去。

再打发第二个仆去，个的耕种嘅人亦打佢，而且凌辱佢，令佢空手番去。

更打发第三个仆去，个的耕种嘅人打伤佢，赶逐佢添。

个菩提园主就话，我要点样做呢，要打发我所爱嘅仔去，或者佢地睇见，就恭敬佢咯。

但个的耕种嘅人睇见佢，就私吓斟酌话呢个係承受家业嘅仔，我地嚟杀死佢，等个的家业归我地咯。

噉就赶佢出菩提园外杀哓，园主点样处置佢地呢。

佢必定嚟到，剿灭个的耕种嘅人，𢬿个园交托别人咯。个的听见嘅人就话，唔好有噉嘅事呀。

耶稣睇住佢地话，圣经所写，起屋师傅所丢弃嘅石，做哓屋角第一块石，係点解呢。

凡跌落呢嚿石上嘅人，必定损伤，但呢嚿石跌落佢身上嘅，是必碛碎佢咯。

个阵时，大众祭司长共读书人，知到耶稣讲呢的譬喻，係指佢地，就想捉佢，但係怕百姓呮。

就静静𥅾佢，打发探子假扮做义人，等执佢嘅说话，解佢去总督个处处治佢。

探子就问耶稣话，先生，我地知你所讲所传嘅，俱係正道，你唔𢬿外貌嚟取人，乃係真实嚟传上帝嘅道。

我地纳税过该撒，着唔着呢。

耶稣知到佢地嘅诡计，就对佢地话，做乜你地试我呢。

俾个银钱仔我睇吓，个相头共国号，係乜谁嘅呢。佢地答话，係该撒嘅。

耶稣对佢地话，噉就𢬿该撒嘅物件，纳过该撒，𢬿上帝嘅物件，纳过上帝喇。

个的探子喺百姓面前，唔执得倒佢嘅说话，而且惊奇佢嘅应对，就冇声出。

个的撒吐该人，话人冇番生嘅，其中有的嚟问耶稣话。

先生，摩西写落书嚟指示我地嘅话，倘若人嘅兄弟有妻，冇仔就死哓，佢嘅兄弟，要娶佢嘅妻，生仔嚟承继佢。

从前有七个兄弟，至大嘅娶妻，冇仔就死哓。

第二嘅娶佢嘅妻，又冇仔死哓。

弟三嘅又娶佢，至到第七嘅都娶过佢，俱冇仔生落死哓。

收尾个女人亦死。

在复生之时，个女人做佢地边个嘅妻呢，因为呢七个都娶过佢咯。

耶稣答佢地话，呢世嘅人，有嫁有娶呮。

惟係堪得到个世，及由死者之中番生嘅，就冇嫁冇娶咯。

以后不能再死，因为佢好似天使，又係上帝嘅仔，就係复生嘅人咯。

讲到死人复生嘅事，摩西在荆棘篇有讲明咯，佢称主做亚伯拉罕嘅上帝，以撒嘅上帝，雅各嘅上帝。

但上帝唔係死者嘅上帝，乃係生者嘅上帝，因为众人在佢面前，都係生嘅呀。

个的读书人有的答佢话，先生，你讲得着咯。

后来就冇人敢盘问佢。

耶稣对众人话，人地点话基督係大辟嘅子孙呢。

喺诗篇中，大辟自己讲，主对我嘅主话，

坐倒我右边，等我𢬿你嘅仇敌，做你嘅脚踏凳。

大辟既然称基督做主，噉基督点样係大辟嘅子孙呢。

众百姓听讲个时，耶稣对佢嘅门生话。

提防个的读书人呀，佢地好着长衫，出去游行，又欢喜喺市上请安，喺会堂坐大位，喺筵席坐上位。

但係佢吞寡妇嘅家财，假意做长长祈祷佢地将来受刑罚，是必更重呀。