路加福音 22 · 1883《路加传福音书》（粤语联合译本修订本，香港教育大学数据）

除酵节，又叫做逾越节，係将近咯。

众祭司长读书人，商量点样杀得耶稣，但係怕百姓呮。

十二使徒之中，有一个加畧人，名叫犹大，撒但入哓佢心。

佢就去同众祭司长，及各官斟酌点样交得耶稣过佢哋。

佢哋就欢喜，约定俾银过佢。

犹大应承，就揾机会，𥅾众人唔喺处，交耶稣过佢哋。

除酵日，即係要㓥逾越节羊仔嘅日。

耶稣打发彼得共约翰话，你去为我哋预备逾越节嘅筵席，等我哋食喇。

佢哋就对佢话，你想我哋喺边处预备呢。

耶稣对佢哋话，你入城个时，必有一个拧水埕嘅人遇着你，佢所入嘅屋，你就跟佢入。

对个家主话，老师问你，人客房喺边处呢，我将共我嘅门生，喺处食逾越节嘅筵席呀。

佢必俾一间摆设齐整嘅大楼过你睇，你就喺个处预备喇。

佢哋去，果然遇着照依耶稣对佢所讲嘅，就预备逾越节嘅筵席。

个时候既到，耶稣同埋十二个使徒坐席。

耶稣对佢哋话，我受难之先，好想同你哋食呢个逾越节嘅筵席。

我话你哋知，我唔再食呢个节嘅筵席，等到呢的事，应验在上帝国致食咯。

就拧起只杯嚟感谢话，将呢的分开大家饮喇。

我话你哋知，我唔再饮菩提汁，等到上帝国嚟致饮咯。

耶稣又拧起饼嚟感谢，擘开俾佢哋话，呢的係我嘅身，为你哋舍去嘅，你要做呢件事嚟记念我。

食完节筵，亦係噉样拧起只杯话，呢只杯係新约，在我嘅血，代你哋流𡃉。

但係卖我个人，佢嘅手同我喺席上咯。

人子去世，係照先头所定嘅，但係卖人子嘅，佢有祸咯。

众人彼此相问，我哋之中，乜谁哙做呢件事呢。

门生彼此争论，喺佢哋之中边个做大。

耶稣对佢哋话，异邦之君王，管理佢嘅百姓，揸权柄嘅，人称为恩主。

但你哋唔好噉样，你哋之中做大嘅，应该好似细嘅，做头人嘅，应该好似做使唤嘅噉。

边个係大呢，係坐席上嘅，抑或係使唤嘅呢，岂唔係坐席嘅大咩，但我喺你哋之中，好似使唤嘅人噉呀。

你哋常时同我，喺我嘅患难之中。

我𢬿国封你哋，好似我父封我噉。

等你哋喺我嘅国，坐倒我席上饮食，而且坐倒高位，审判以色列族十二支派。

主又话，西门呀，西门呀，撒但也曾想得你哋嚟筛，好似筛麦噉。

但我已经为你祈祷，等你嘅信德唔失嘥，你归正之后，要坚固你嘅兄弟。

彼得对佢话，主呀，我肯同你去坐监，又同埋你死。

耶稣话， 彼得呀，我话你知，今日鸡啼之先，你将三次话唔识我。

耶稣对门生话，我打发你，唔使带荷包，唔使带细袋，唔使带鞋嘅时候，你哋有缺乏冇呢，答话，冇呀。

就对佢哋话，如今有荷包嘅要带去，有细袋嘅都係噉，冇刀嘅，就要卖哓衫嚟买一把嚹。

我话你哋知，圣经所写，人哋算佢係犯罪嘅人，个句说话，是必应在我身上，因为所指着我嘅事，必要成就嘅。

门生话，主呀，有两把刀喺呢处咯。耶稣对佢哋话，够咯。

耶稣出嚟，仍旧去橄榄山，门生亦跟从佢。

到哓个处，就对门生话，你哋祈祷喇，免致入诱惑呀。

就离开佢哋，大约擗一嚿石咁远，跪倒处祈祷。

话，父呀，你若係肯，就𢬿呢只杯离开我，但唔係成就我嘅旨意，乃係成就你嘅旨意呀。

有一位天使，从天上显现，壮健耶稣。

耶稣好伤心，越发恳切祈祷，所出嘅汗，好似大滴血噉，跌落地下。

祈祷完，就起身，嚟到佢嘅门生处，见佢哋因为忧闷瞓哓。

就对佢哋话，做乜瞓觉呢，起身祈祷喇，免致入诱惑呀。

佢讲紧个时，有群众嚟到，十二门生之中，有一个叫做犹大，佢先头行，埋到耶稣面前想亲嘴。

耶稣对佢话，犹大呀，你用亲嘴做暗号，嚟卖人子咩。

左右嘅人，见事将近，就话，主呀，我𢬿刀斩佢哋好唔好呢。

其中有一人，斩大祭司长嘅仆，削甩佢嘅右耳。

耶稣答话，事干已经至到噉，由得佢喇，就摩吓个人嘅耳，医好佢。

耶稣对嚟到嘅祭司长殿堂官，及长老话，你哋拧刀共棍嚟，好似捉贼噉咩。

我日日同埋你哋喺殿堂，你唔下手捉我，但如今係你哋嘅时候，黑暗嘅权势咯。

众人捉住耶稣，拉佢去大祭司长嘅屋企，彼得远远跟从。

喺两廊处，有人透着火，同埋坐处，彼得亦坐在佢哋之中。

有一个妹仔，见佢对住火坐处，就定眼睇佢话，呢个人也曾同耶稣一处𡃉。

彼得唔认就话，女子呀，我唔识佢。

歇一阵，第二个人睇见佢话，你都係佢哋一党[口手力]。彼得话，朋友呀，我唔係噃。

再歇一点钟咁耐，又第二个人指实佢话，呢个人真係同埋佢𡃉，因为佢係加利利人。

彼得话，朋友呀，我唔知你讲乜野，讲紧个时，鸡就啼咯。

主回头睇住彼得，彼得记起主对佢所讲，话，鸡啼之先，你将三次话唔识我。

噉就出去，哭得好深伤。

揸住耶稣嘅人，戏弄佢打佢。

揞住佢嘅眼问佢话，你係先知，就话明乜谁打你吖。

又讲好多说话添，嚟亵凟耶稣。

到天光，民间嘅长老，大众祭司长，及读书人，聚埋一处，拉耶稣嚟到佢哋嘅公所。

话，你真係基督，就话我哋知。

耶稣对佢话，我若话你哋知，你哋唔信我，若问你，你都唔答我，又唔肯放我。

自后，人子将坐倒全能上帝嘅右边咯。

众人话，噉你係上帝之子咩。耶稣对佢哋话，你哋话得着咯，我真係𡃉。

大众就话，我哋重要揾乜野证据呢，因为我哋已经听见佢亲口讲嘅咯。