路加福音 8 · 1883《路加福音传》（粤语联合译本修订本，香港理工大学数据）

自后耶稣周围游行、去各城各乡、传上帝国嘅福音、十二个门生同埋佢去。

又有几个妇人、平日被鬼迷及染病嘅、已经医好、一个係抹大拉嘅马利亚、耶稣也曾喺呢个妇人、赶过七只鬼出嚟嘅咯。

又有希律个管家苦撒嘅妻约亚拿、又有苏撒拿、另外好多妇人、都𢬿佢所有嘅嚟供奉耶稣。○

群众喺各城出嚟、聚埋耶稣处、耶稣用譬喻嚟讲话。

有个撒种嘅人、出去撒种。撒个时、有的种跌落路边、被人踹哓、空中嘅雀鸟嚟食嘥。

有的跌落石上嘅、生出嚟、就枯哓、因为冇乜滋润。

有的跌落荆棘里头、个的荆棘同埋生、就逼死佢。

有的跌落肥地嘅、生出嚟、结实有一百倍。耶稣讲完呢的、就大声话、有耳可听嘅、就要听嚹。○

门生嚟问耶稣话、呢个譬喻、係乜野意思呢。

耶稣话、上帝国嘅奥妙、俾你知呮、若係别人、就讲譬喻、令佢睇亦唔见、听亦唔明。

呢的譬喻係噉样、个的种、即係上帝之道。

喺路边嘅、即係人听道、魔鬼就嚟、将佢心中嘅道抢去、恐怕佢信就得救呀。

喺石上嘅、係人听道、就欢喜接受、但里头冇根、不过暂时信呮、遇著试炼、就违背咯。

跌落荆棘中间嘅、係人听过道去哓、就被今世嘅挂虑、财帛、快乐、逼住个的道、所以唔结得实。

喺肥地嘅、係人𢬿善良嘅心嚟听道、谨守忍耐、噉就结实咯。○

冇人点灯、俾器皿搇住佢、或挤倒床底、必係挤倒灯台上、俾入嚟嘅人就见光。

因为总冇隐密嘅事、将来唔显明、藏埋嘅事、将来唔露出呀。

所以谨愼点样听道理、因为有嘅就加俾佢添、冇嘅就连佢自己以为有嘅、都要抢埋。○

耶稣嘅母亲与及兄弟嚟、因为人多、不能近得佢。

有人对耶稣话、你母亲共你兄弟、企倒外出、想见你呀。

耶稣答佢哋话、听上帝道理、又照依噉样行嘅、就係我母亲共我兄弟咯。○

一日耶稣共门生落船、对佢哋话、我哋过湖嚹、噉就开身、

行紧船个时、耶稣瞓著、喺湖中间、忽然翻起大风。打得满船水、十分危险。

门生行埋去、叫醒耶稣话、夫子、夫子、我哋死咯。耶稣就起身、喝个的风共浪、即时就风平浪净。

耶稣对门生话、你嘅信德喺边处呢。大众慌起嚟、见出奇、相讲话、呢个係乜野人呢、吩咐个的风共水、亦听从佢呢。○

个只船行到加利利对面加大拉嘅地方。

耶稣上岸、遇著一个人、係在城里出嚟被鬼迷嘅、好耐唔著衣服、又唔喺屋住、住在坟墓里头。

一见耶稣、就跪倒面前、大声叫话、至高上帝之子耶稣、我于你何干呢、求你唔好令我受苦呀。

因耶稣也曾吩咐邪鬼离开个人、个人已经被鬼强抢佢好多账咯、虽俾锁链锁住、俾脚镣镣住佢、都𢬿锁链脚镣嚟整断、被鬼赶去到旷野。

耶稣问佢话、你叫做乜名呢、佢话、我叫做军、因为迷佢嘅鬼有好多。

就求耶稣唔好吩咐佢落阴府。

个处有一大队猪、喺山上食野、个的鬼求耶稣准佢入个队猪处、耶稣就准佢。

个的鬼即时离开个人、入去猪处、忽然个一队猪走落山坡、入湖𠴥死。

看猪嘅人、睇见个的事情、就走入城里、走落乡下、话过人知。

众人出嚟、想睇个的事情、嚟到耶稣处、睇见先头被鬼迷嘅人、著番衣服、自自在在、坐倒耶稣脚下、众人就慌起嚟。

亲眼睇见嘅人、就话过佢哋知、被鬼迷嘅、点样得医好。

加大拉周围地方嘅人、求耶稣离开个处、因为佢哋十分惊慌、耶稣就落船番去。

先头被鬼迷个人、嚟求跟随耶稣、但耶稣打发佢去。

话你去归屋𨀣喇、将上帝为你所做咁大嘅事、话过人知。个人就去城里周围、讲耶稣为佢做咁大嘅事。○

耶稣番嚟、众人迎接佢、因为众人等候佢。

有一个管理会堂嘅人、名叫睚鲁、嚟跪倒耶稣脚下、求耶稣去佢屋𨀣。

因佢有个孤独女、大约十二岁、将近死咯。耶稣行去个时、众人挤拥住佢。

有个妇人、染血漏嘅病、已经十二年咯、请医生嚟医、使尽家业、都冇一个医得佢好。

就跟住耶稣背后、摩佢嘅衫边、血漏即时止哓、

耶稣就话、边个摩我呢、大家都唔认、彼得与及同埋嘅人话、夫子、众人咁挤拥逼住你呀。

耶稣话、有人摩我、因为觉得有异能喺我身出呀。

个妇人知到唔瞒得过、就震起嚟、前去跪倒耶稣脚下、喺众人面前、自认摩佢嘅缘故、共埋即时、得好嘅情形。

耶稣对佢话、女呀、你嘅信德拯救你、平安去归喇。

讲紧个时、有个人从管理会堂嘅家中嚟、对佢话、你嘅女已经死哓咯、唔使劳动老师咯。

但耶稣听见、就答佢话、唔使慌、独係要立信心、你嘅女就必得救咯。

耶稣入屋个时、除哓彼得约翰雅各、共个女仔嘅父母之外、唔俾别人入去。

众人为呢个女仔、哭得好哀痛、但耶稣话、唔使啼哭、因佢唔係死、不过瞓著呮。

众人知到佢已经死、噉就笑佢。

但耶稣揸住女仔嘅手、叫佢话、女仔起身喇。

佢嘅灵魂番嚟、佢即时起身、耶稣吩咐俾野过佢食。

佢父母好惊奇、耶稣禁止佢、唔好𢬿所做嘅事话过人知。