路加福音 9 · 1883《路加传福音书》（粤语联合译本修订本，香港教育大学数据）

耶稣叫齐十二个门生嚟，俾佢有权势，可以制鬼医病。

打发佢传讲上帝嘅国，医有病嘅人。

又对佢哋话，唔使带盘费，或拐杖，或袋，或口粮，或银，又每人唔使带两件衫。

凡入入家，喺个处住，亦由个处去。

有人唔接你哋，你离开个城之时，就拍干净脚底的尘，嚟做众人嘅见证。

门生出去，在各村乡游行，处处传福音，医人嘅病。

分封嘅国王希律，听见但凡所做嘅事，就好疑惑，因为有的话，係约翰由死复生。

有的话，係以利亚显现，又有的话，係古时嘅先知，其中一个复生。

希律话，约翰我已经斩哓咯，如今又听闻噉嘅事，呢个实在係乜谁呢，就想见佢。

使徒番嚟，𢬿所做嘅事，囘覆耶稣，耶稣就带佢静静出去，到一个城叫做伯赛大。

众人知到，就跟住佢，耶稣接哓众人，共佢讲论上帝嘅国，凡有病要医嘅，就医好佢。

热头侧个时，十二个门生嚟对耶稣话，请你叫众人散，令佢去各村乡歇宿，与及揾野食喇，因为我哋在呢处係旷野呀。

但耶稣对佢哋话，你哋俾佢食喇，门生话，我哋独係有五个饼两条鱼呮，唔通去买食物，俾佢哋大众食咩，

因为大约有五千人呀。耶稣又对门生话，叫大众排开坐倒处，每队五十人。

佢照依噉做，叫大众坐倒处。

耶稣拧起个五个饼两条鱼，望住天祝谢，擘开交过门生，叫佢派开喺众人面前。

大众都食到饱，执埋余剩嘅砸碎，装满十二篮。

耶稣闲住，自己祈祷个时，门生都同埋佢喺处，耶稣问佢哋话，众人话我係乜谁呢。

门生答佢话，有人话係施洗嘅约翰，有人话係以利亚，有人话係古时嘅先知，其中一个复生。

耶稣对佢哋话，但你哋话我係乜谁呢。彼得就答话，你係上帝嘅基督咯。

耶稣禁止佢，吩咐咪话过人知。

又话，人子是必受好多害，被长老、共众祭司长及读书人丢弃，而且被人杀哓，第三日复生。

又对大众话，想跟从我嘅，就应该克胜自己，日日孭十字架嚟跟从我。

因为但凡想救佢生命嘅，必定失佢生命，但凡为我嘅事，失哓生命嘅，必定救佢生命。

人若得嘥天下嘅利益，但丧失自己嘅生命，有乜益呢。

但凡有人当我共我嘅道理係羞耻。到人子将自己荣光，共埋天父及圣使嘅荣光降临个时，又必定当个人係羞耻咯。

我实在话你知，企倒呢处嘅，有人未死之先，必得见上帝嘅国。

讲呢的说话之后，大约有八日，耶稣带彼得约翰雅各，上山祈祷。

祈祷个时，容貌比之平日唔同，佢嘅衣服，洁白而且放光。

忽然间，有摩西以利亚两个人，共耶稣讲。

在荣光中显现出嚟，讲论耶稣去世之事，要在耶路撒冷做成嘅。

彼得及同埋嘅人， 因为疚癐，就瞓着，临醒之时，睇见耶稣嘅荣光，又有两个人共佢企处。

个两人离别佢之时，彼得对耶稣话，夫子，我哋喺呢处好咯，等我哋搭三间茅屋，一间为你，一间为摩西，一间为以利亚，但自己唔知讲乜野。

讲紧个时，有云遮住佢哋，入云里头，门生就慌起嚟。

有声喺云间出嚟话，呢个係我嘅爱子，你哋应该听佢话呀。

声音歇后，见耶稣独自喺处，门生当日总唔出声，唔𢬿所见嘅事话过人知。

第二日，落山个时，有群众迎接耶稣。

其中有一人，大声叫话，老师，求你睇顾我嘅仔，因为我独係生佢呮。

佢有时被鬼揸住，忽然叫喊，抽起筋嚟，口流白泡，鬼伤害佢，实在难离开呀。

我也曾求你嘅门生赶佢，但佢哋不能。

耶稣答话，唉，不信及背逆嘅世代，我同埋你喺处，忍耐你哋到几时呢，带你嘅仔嚟呢处喇。

适值嚟个时，个鬼推倒佢，又抽起筋嚟，耶稣责罚个邪鬼，医好个仔，交番佢父亲。

众人惊奇上帝嘅大权能，佢哋于耶稣所做嘅事，正在见出奇个时，耶稣对佢门生话。

人子将卖过人手咯，呢句说话，你应该藏埋耳里呀。

但係门生唔晓呢句说话，因为係隐密嘅，故此唔明白，又唔敢问佢。

门生发起议论边个为大。

耶稣知到佢哋心内嘅意思，就带一个细蚊仔嚟，安置在侧边。

对门生话，但凡因我名，接呢个细蚊仔，即係接我，接我即係接打发我嘅。因为在你哋之中至细嘅，佢係做大嘅呀。

约翰答话，夫子，我哋睇见一个人，借你名赶鬼，我哋禁止佢，因为佢唔跟从我哋呀。

耶稣对佢话，唔好禁止佢，因为唔共你做对敌嘅，就係归从你哋嘅咯。

耶稣升天嘅日子将到，就立定主意，面向耶路撒冷而行。

打发使者先去，佢哋去到撒马利亚地方，入一条村，替佢预备地方。

个条村嘅人，唔肯招接，因为佢面向耶路撒冷行呀。

佢嘅门生雅各，约翰，睇见噉样，就话，主呀，我叫火从天落嚟，烧灭佢哋，照依以利亚所做嘅噉，你想唔想呢。

耶稣回头责成佢哋话，你哋嘅心点样你自己都唔知到。

人子嚟，唔係灭人嘅生命，实係救佢嘅，噉就去第二条村。

行路个时，有一人对耶稣话，唔论你去边处，我必跟从你。

耶稣答佢话，狐狸有穴，空中嘅雀鸟有巢，但人子连枕头嘅地方都冇呀。

又对第二个人话，跟从我喇，但佢话，主，准我先番去归，埋葬我嘅父亲。

但耶稣对佢话，任从死人，葬佢嘅死人，你去传上帝国嘅道理。

又有一个人话，主，我想跟从你，但准我先去归，共我家内嘅人辞别呀。

耶稣对佢话，手执犁耙，又回头睇后便嘅，在上帝国唔合呀。