耶稣出殿之时，有一个门生对佢话：「老师，你睇吓噉嘅石、噉嘅殿宇吖！」
耶稣对佢话：「你见呢间大殿宇哩？将来冇一嚿石留番第嚿石之上唔被毁拆𡃉。」
耶稣喺橄榄山上对住殿坐，彼得、雅各、约翰、安得烈静静问佢话：
「请你话我哋知，几时有呢的事呢？而且呢的事一切将应验时，有乜兆头呢？」
耶稣对佢哋话：「你哋谨愼，咪俾人迷惑呀！
将来有好多人假冒我名嚟，话：『我係基督。』就迷惑好多人。
惟係你听闻打仗与及打仗嘅风声，唔使慌，呢的事是必有，但係末日未曾到呮。
民将攻打民，国将攻打国，到处都有地震、饥荒；呢的係灾难嘅起首。
你哋要谨慎愼自己，因为人将解你哋过公会，喺会堂里打你，又为我解你企在大官国王面前，嚟做佢嘅见证。
但係福音必先传到万国。
人哋拉你解官个时，唔使预先挂虑点样讲，到个阵时，但凡赐过你讲嘅，你就噉讲，因为唔係你自己讲，乃係圣神讲呀。
兄弟将解兄弟去害死，父亲待仔亦係噉样；仔女亦起嚟攻击父母，𢬿佢害死。
你哋为我名必受众人憎恶，惟係忍耐到底嘅，佢必得救。
你哋睇见个的残害可恶嘅物企在唔应企嘅地方（读呢的书嘅要明白呀），个时喺犹太地嘅，当要走上山。
喺屋上嘅人唔好落去，亦唔好入屋攞什物出嚟。
喺田嘅人唔好回头攞衣服。
当个阵时怀胎及喂奶嘅女人有祸咯！
你哋应该祈祷，免致喺冬天时避难呀。
因为当个阵时必有祸患，自从上帝创造万物至到如今未有噉样，后来亦冇噉样嘅。
设使主唔减少个的日子，就凡有血气嘅冇一个得救咯；单係因佢所揀选嘅民，致减少个的日子。
个时若有人对你哋话：『基督喺呢处！』或『个处！』你唔好信。
因为将来有的假基督、假先知出嚟，做异迹奇事，倘若诱惑得揀选嘅民，就诱惑佢咯。
你哋要谨愼呀，我预先讲徙过你听咯。
当个阵时，个的祸患之后，热头将变黑暗，月色亦唔发光，
星由天跌落，天上各象都震动。
个时佢哋就见人子𢬿大权能、大荣光，坐住云落嚟。
就打发天使聚埋四方所揀选嘅，自从地之极处至到天之极处。
你哋要学无花果树嘅譬喻：当佢枝软发叶个时，就知到将近夏天咯。
噉，你哋见有呢的事，就知到人子係近，嚟到门口咯。
我实在话你知，呢个世代未曾过，呢的事俱要成就嘅。
天地必哙废坏，但我嘅说话断唔哙废坏。
惟係个的日期、个的时候，冇人知到，即使天上使者与及人子都唔知，独係父知到呮。
你哋要谨愼，儆醒祈祷，因为你唔知个日期几时到呀。
好比一个人离开佢家，去远处游，𢬿权柄交过佢仆，分开的事俾各人做，又吩咐看门嘅要儆醒。
故此你哋应该儆醒，因为唔知家主几时嚟，或係挨晚，或係半夜，或係鸡啼，或係天光，
怕佢忽然嚟到，遇著你哋瞓哓。
我所话过你听嘅，亦係话过众人听：要儆醒呀！」