耶稣再喺海边教人，有群众嚟亲就佢，噉佢就落船坐处，浮在海面，众人喺海边，企在岸上。
耶稣设譬喻，𢬿多端教佢哋，教训之时，对众人话。
你哋听呀，有一个撒种嘅人出去撒种。
撒个时，有的跌落路边，雀鸟嚟到食嘥。
有的跌落石地泥薄个处，因为泥土唔深，发芽好快。
但係冇根，热头出嚟晒佢，就枯槁咯。
有的跌落荆棘里头，荆棘发生起嚟，就逼死佢唔结得实。
有的跌落肥地，发生长大起嚟，结实有三十倍，有六十倍，有一百倍。
又话有耳可听嘅，就要听嚹。
耶稣静坐个时，围住佢嘅人，共十二门生，𢬿呢的譬喻问佢，耶稣对佢哋话。
上帝国嘅奥妙，係俾过你哋，若係外人，就要用譬喻教佢。
等佢哋虽然睇，都唔明白，虽然听，都唔晓得，免至佢改变而得罪赦。
又对佢哋话，呢的譬喻，你都唔晓，点晓得各样譬喻呢。
撒种嘅，即係传道理。
撒落路边嘅，即係人嘅听道理，撒但就嚟，将撒在佢心嘅道抢哓。
撒落石地嘅，即係人听道理，就欢喜接受。
但係心内冇根蔃，不过暂时呮，及至为道有艰难陷害，佢就即时厌弃。
撒在荆棘里头既，即係人听道理。
有今世嘅挂虑，共钱财嘅迷惑，与及各样嘅私欲，都嚟逼死道理，唔结得实。
撒落肥地嘅，即係人听道理，就接纳哓，而且结实起嚟，有三十倍，有六十倍，有一百倍嘅。
耶稣又对佢哋话，人拧灯嚟，岂係挤落斗下，或床下嘅，唔係挤在灯台上嘅咩。
因为总冇隐密嘅事，将来唔显现，藏埋嘅事，将来唔露出嚟。
但凡有耳可听嘅，就要听呀。
又对佢哋话，你哋要谨愼所听呀，你点样量度人，人亦必噉样量度你，而且是必加多赐过你。
因为有嘅，重要加添过佢，冇嘅，就连佢所有都要夺番。
又话，上帝嘅国，好比人撒种落地。
佢日间起，夜间瞓，个的种发芽长大，个人都唔知佢点得噉样。
地土自然能结实嘅，始初係秧，渐渐成穗，及后穗上结满谷。
已经长熟，就用镰刀，因为收割嘅时候到咯。
又话，上帝嘅国，好比乜野呢，我地设乜野譬喻嚟解明佢呢。
好似一粒芥菜仁，撒落地个时，係世上百样仁之中至细嘅。
撒落之后，就发起嚟，大过各样嘅菜，而且生出的枝好大，至到空中雀鸟可以住在佢阴处。
耶稣又用好多噉嘅譬喻，对众人传道，係照依佢哋所能听嘅。
唔係譬喻，就唔对众人讲，到净係佢哋喺处个时，佢解明嘥过门生听。
个日挨晚时，耶稣对门生话，我哋要过个便岸。
噉就门生散哓众人，耶稣仍然喺船上，佢哋就共佢过海，另外有别只船同行。
即有狂风大起，浪打入船，将近满咯。
耶稣喺船尾，枕住枕头瞓，门生叫醒佢，就对佢话，老师，我哋死咯，你都唔顾咩。
耶稣起身，喝个的风，对住海话，平静喇，咪摇动咯，个的风就止息，海极平静。
耶稣就对门生话，你哋使乜慌呢，未曾有信德咩，佢哋好惊慌。
大家相讲话，呢个，係乜野人呢，风共海，亦顺从佢呀。