多比傳　第4章

嗰日，多比諗起自己交畀迦巴勒、存喺瑪代拉基嘅銀子。

佢心諗：「我已經求死，點解唔喺死之前叫個仔多比雅嚟，話畀佢知嗰筆銀子嘅事呢？」

佢就叫個仔多比雅嚟。多比雅嚟到，多比對佢講：「要好好埋葬我。你要尊重媽媽，佢在生嘅每一日都唔好離棄佢。要做令佢喜悅嘅事，乜嘢事都唔好令佢傷心。

仔，要記住媽媽，佢懷住你嗰陣，經歷過好多危險。等佢死咗，要將佢埋喺我身邊，同我一個墳墓。

仔，你一生都要記住主，唔好存心犯罪，違反佢嘅誡命。你活住嘅每一日都要行公義，唔好行不義嘅路。

因為按真理做事嘅人，所做嘅事會順利，

凡行公義嘅人都一樣。〔GI借補〕要用自己所有嘅財物施捨，施捨嗰陣唔好吝嗇。唔好轉面唔理任何窮人，上帝亦唔會轉面唔理你。

按你所有嘅多少去施捨；就算你只有少少，亦唔好因為少就唔敢施捨。

因為你噉樣做，就係為自己積存美好嘅財富，留待患難嘅日子。

施捨能夠救人脫離死亡，唔畀人落入黑暗。

對每一個施捨嘅人嚟講，施捨係至高者面前嘅美好禮物。

仔，要留心避開一切淫亂。娶妻，首先要娶祖先本族嘅女子，唔好娶唔屬於你父家支派嘅外族女子，因為我哋係先知嘅後代。挪亞、亞伯拉罕、以撒、雅各，係我哋遠古嘅祖先。仔，要記住，佢哋都娶咗親族中嘅女子，喺仔女身上得到祝福，佢哋嘅後代會承受土地。

仔，要愛你嘅同胞，心裡面唔好驕傲，睇唔起同胞同自己民族嘅男女，唔肯喺佢哋當中娶妻。驕傲會帶嚟毀滅同嚴重混亂；懶散會帶嚟衰敗同極大困乏，因為懶散就係飢餓嘅母親。

任何人替你做工，唔好將佢嘅工錢扣到第二日，要即刻出糧畀佢。你服事上帝，亦會得到報答。仔，你做乜嘢事都要留心，言行舉止要有規矩。

自己憎嘅事，唔好做喺任何人身上。飲酒唔好飲到醉。喺你行嘅路上，亦唔好畀醉酒跟住你。

要分自己嘅食物畀飢餓嘅人，分自己嘅衫畀冇衫著嘅人。你有餘嘅嘢，都用嚟施捨；施捨嗰陣唔好吝嗇。

要將食物放喺義人嘅墳墓上，唔好畀罪人。

要向明智嘅人請教，任何有用嘅勸告都唔好睇唔起。

無論幾時，都要頌讚主上帝，求佢讓你行正路，叫你所走嘅路、所諗嘅計劃都順利。各民族都缺少明智嘅計策，但係〔回S〕主會賜好主意畀佢哋。主想使邊個降卑，就可以使佢低到陰間最深處。仔，要記住呢啲誡命，唔好畀佢哋喺你心裡面消失。

仔，而家我話畀你知，我曾經將十他連得銀子交畀迦布里家嘅迦巴勒，存喺瑪代嘅拉基。

仔，唔好因為我哋窮咗就害怕。只要你敬畏上帝，避開一切罪，做主你上帝睇為好嘅事，你就擁有好多美好嘅嘢。」