猶滴傳　第10章

猶滴向以色列嘅上帝呼求，講完以上所有嘅話，

就從俯伏嘅地方起身，叫侍女過嚟，一齊落去屋裡面。每逢安息日同節期，佢都喺嗰度度過。

佢解開身上嘅麻布，脫去寡婦嘅衣服，用水洗身，搽上濃厚嘅香膏，梳好頭髮，戴上頭巾，換上歡慶時着嘅衣服。丈夫瑪拿西在生嗰陣，佢就係着呢啲衣服打扮自己。

佢着上涼鞋，戴好手鐲、臂環、戒指、耳環同所有飾物，悉心裝扮得美麗動人，要迷住每個見到佢嘅男人。

佢交畀侍女一皮囊酒同一罐油，又將炒穀粉、果餅同潔淨嘅餅裝滿一個袋，包好所有器皿，叫侍女帶住。

佢哋行到伯圖利亞城門，見到烏西雅同城中長老哈布里、迦米企喺嗰度。

佢哋見猶滴樣貌唔同咗，服飾亦換晒，對佢嘅美貌大為驚訝，就對佢講：

「願我哋祖先嘅上帝使你得人喜愛，成全你嘅計劃，令以色列人自豪，使耶路撒冷得尊榮。」

猶滴敬拜上帝，然後對佢哋講：「請吩咐人為我開城門，等我出去，實現你哋啱啱對我講嘅話。」佢哋就照猶滴所講，吩咐青年為佢開門。

青年照辦，猶滴同侍女就一齊出去。城裡面嘅人一直望住佢，睇住佢落山，穿過山谷，直到再睇唔見佢。

佢哋沿住山谷直行，一隊亞述前哨遇上猶滴，

捉住佢，問：「你係邊族人？從邊度嚟？要去邊度？」猶滴回答：「我係希伯來女子，正從佢哋嗰度逃出嚟。佢哋就快交喺你哋手上，畀你哋吞滅。

我係嚟見你哋嘅統帥何羅弗尼，將實情話畀佢知。我會當面指一條路畀佢，等佢行呢條路，就可以佔領成個山區。佢手下連一個人都唔會喪命，連一口生命嘅氣息都唔會失去。」

士兵聽到佢嘅話，又望住佢張臉，覺得佢真係美麗得驚人，就對佢講：

「你咁快落嚟見我哋嘅主人，救咗自己一命。嚟啦，去佢嘅營帳。我哋會派人護送你，直到將你交畀佢。

企喺佢面前嗰陣，唔使驚，照頭先嘅話講畀佢聽就得，佢會善待你。」

佢哋挑選咗一百個人，陪同猶滴同侍女，帶佢哋去何羅弗尼嘅營帳。

猶滴嚟到嘅消息傳遍各個營帳，全營嘅人都跑嚟。佢企喺何羅弗尼營帳外面，等人入去通報，眾人就圍住佢。

佢哋驚嘆猶滴嘅美貌，因為佢，亦對以色列人另眼相看。各人對旁邊嘅人講：「呢個民族有噉嘅女人，邊個仲敢睇小佢哋？佢哋嘅男人真係一個都留唔得。留低佢哋，佢哋就有本事用計謀對付全地！」

瞓喺何羅弗尼身邊值宿嘅人，同佢所有侍從出嚟，將猶滴帶入營帳。

何羅弗尼正喺床上休息，床上掛住蚊帳，用紫色布料織成，織有金線，又綴上綠色寶石同各種名貴寶石。

有人向佢通報猶滴嘅事，佢就走到帳篷前廳，前面有銀燈引路。

猶滴嚟到何羅弗尼同侍從面前，所有人都驚嘆佢容貌美麗。猶滴俯伏向何羅弗尼行禮，佢嘅僕人就扶猶滴起身。