所羅門智訓　第12章

因為你不朽嘅靈喺萬物裡面。

所以，人跌倒犯錯，你就逐步責備，
提醒佢哋所犯嘅罪，勸誡佢哋，
等佢哋離開邪惡，主啊，轉而信靠你。

以前住喺你聖地嘅人，

你厭惡佢哋，因為佢哋做極可憎嘅事，
行巫術，舉行不聖潔嘅祭儀。

佢哋無情殺害兒童，
擺下吞食人肉、內臟同血嘅宴席；
嗰啲入咗秘密祭儀團體嘅人，

又身為父母，親手殺死無助嘅生命。
你定意藉我哋祖先嘅手，
將佢哋從嗰個祭儀團體中剷除，

使你看為最寶貴嘅土地，
可以迎接配得住喺嗰度嘅上帝子民。

不過，你亦當佢哋係人，憐惜佢哋，
派黃蜂作軍隊嘅先鋒，逐少逐少消滅佢哋。

唔係因為你冇能力喺戰場上將不敬虔者交畀義人，
亦唔係冇能力用可怕猛獸，或者一句嚴厲嘅話，
將佢哋一舉毀滅。

你逐步審判，係畀佢哋悔改嘅機會。
你並唔係唔知道，佢哋嘅出身邪惡，惡性深植，
佢哋嘅思想永遠都唔會改變。

因為佢哋從起初就係受咒詛嘅後代。
你容讓佢哋犯罪，亦唔係因為怕咗邊個。

有邊個會質問你：『你做咗乜嘢？』
有邊個可以反對你嘅判決？
你所造嘅民族滅亡，有邊個可以指控你？
又有邊個會企出嚟，同你對抗，替不義嘅人申冤？

除咗你，冇別嘅神眷顧萬有；
你唔需要向另一位神證明，自己冇審判不公。

亦冇君王或者掌權者，
可以為你懲罰過嘅人，當面抗衡你。

你係公義嘅，以公義治理一切。
你認為，將唔應該受罰嘅人定罪，
同你嘅能力格格不入。

你嘅力量係公義嘅根源；
你作萬有主宰，所以憐惜萬有。

當人懷疑你全備嘅能力，你就顯出力量；
明知你能力嘅人，你亦會責斥佢哋嘅狂妄。

你掌握力量，卻溫厚噉審判，
滿有寬容噉治理我哋，
因為只要你願意，隨時都有能力。

你藉呢啲事教導你嘅人民：
義人應該愛人。
你使你嘅兒女滿有盼望，
因為犯罪之後，你仍然畀佢哋悔改。

你兒女嘅敵人，本來應當受死，
你尚且咁審慎、咁寬容噉懲罰，
畀時間同機會，等佢哋擺脫邪惡，

噉你審判自己嘅兒女，就更加細心！
你曾經向佢哋祖先發誓立約，
作出美好嘅應許。

所以，你重重責打我哋嘅仇敵，藉此管教我哋，
等我哋審判人嗰陣，記住你嘅良善，
自己受審判嗰陣，就盼望你嘅憐憫。

嗰啲愚昧度日、行不義嘅人，
你就用佢哋自己敬奉嘅可憎之物折磨佢哋。

佢哋喺迷途上越走越遠，
將動物當中醜陋卑賤嘅種類當成神，
好似冇知識嘅細路噉受到欺騙。

所以，你將審判當作一場戲弄，
降喺佢哋身上，好似對付唔識事嘅細路。

呢啲人受咗好似遊戲嘅責罰，仍然唔聽勸誡，
就會經歷真正配得上帝威嚴嘅審判。

佢哋被自己當成神嘅東西懲罰，
因而受苦、憤怒。
見到呢一切，就認出以前拒絕認識嗰位，先係真上帝。
所以，佢哋最後就迎來被定罪嘅結局。